Boris Conson COP29-un uğurla keçirilməsi münasibətilə Azərbaycanı təbrik edib
Böyük Britaniyanın keçmiş baş naziri Boris Conson COP29 qlobal iqlim konfransının uğurla keçirilməsi münasibətilə Azərbaycanı təbrik edib.
Crossmedia.az xəbər verir ki, bu barədə onun XII Qlobal Bakı Forumunun iştirakçılarına ünvanladığı videomüraciətində deyilir.
"COP29-un hörmətli prezidenti Muxtar Babayevə konfrans sədri kimi verdiyi töhfəyə görə təşəkkür etmək istərdim. Belə bir tədbiri qəbul etdiyinə görə Azərbaycana təşəkkür edirəm", - o bildirib.
B.Consonun sözlərinə görə, COP26-dan sonrakı dövrdə CO2 emissiyalarının azaldılmasında böyük irəliləyişə nail olunub.
"Neft-qaz sənayesinin dünya nəhəngləri, məsələn, Azərbaycanın SOCAR şirkəti də bu müzakirələrdə əsas iştirakçı olublar. Siyasi baxışlarınızdan və ya hansı ölkəni təmsil etməyinizdən asılı olmayaraq, hamımız razılaşa bilərik ki, emissiyaları azaltmaq, həmçinin iş yerlərinin sayını, investisiya həcmini artırmaq üçün çoxlu imkanlar var. Söhbət təkcə planetimizi qorumaqdan getmir. Yaşıl enerji keçidi enerji təhlükəsizliyinin artırılmasına kömək edir ki, bu da hamımızı qeyri-sabit enerji qiymətlərindən qoruya bilər", - o əlavə edib.
Keçmiş baş nazir həmçinin “Better Earth” ("Daha yaxşı dünya") təşkilatının SOCAR və digər beynəlxalq şirkətlərlə emissiyaların azaldılması məsələlərində əməkdaşlıq etməsindən məmnunluğunu ifadə edib.
17:35 14.03.2025
Oxunuş sayı: 591
