Türkiyəli ekspert: "Rusiya- Ukrayna müharibəsi bu il bitəcək, amma..."
Rusiya ABŞ-nin Ukraynada 30 günlük atəşkəs təklifinə şübhə ilə yanaşır. Belə ki, Moskva atəşkəsin Rusiya ordusunun cəbhədəki irəliləyişlərini nəzərə almalı və müəyyən zəmanətləri təmin etməli olduğunu bildirir. ABŞ əvvəl Ukraynaya hərbi yardımı dayandırsa da, Ukraynanın atəşkəsi dəstəkləməyə hazır olduğunu bildirdikdən sonra bu yardımı bərpa etməyə razı olub. Rusiya isə atəşkəsin zəmanətlər olmadan mövqelərini zəiflədə biləcəyindən narahatdır. Kreml hələ bu məsələ ilə bağlı rəsmi açıqlama verməyib.
Rusiya Xarici İşlər naziri Sergey Lavrovun sözlərinə görə, Moskva Ukrayna ərazisində NATO qüvvələrinin mövcudluğunu heç bir halda qəbul etməyəcək.
Bu barədə Crossmedia.az-a danışan türkiyəli politoloq, Şərqi Avropa üzrə mütəxəssis Deniz Berktay bildirib ki, Ukrayna ilə Rusiya arasında atəşkəs elan edilməsi ehtimalından bəhs edilsə də, hazırda tərəflərin mövqeləri çox fərqlidir:
" Rusiya hakimiyyəti Ukraynadan və Qərbdən müəyyən zəmanətlər almadan müharibəni dayandırmaq niyyətində deyil. Bu zəmanətlərin başında Ukraynanın NATO-ya üzv olmayacağı və Ukraynada Qərb ölkələrinin hərbi bazalar qurmayacağı ilə bağlı təminatlar dayanır. Müharibənin səbəblərindən biri də bu məsələ idi. Rusiya bu mövzuda təminat almadan atəşkəs elan edəcəyi təqdirdə Ukrayna ordusunun toparlanmaq imkanı qazanacağı qənaətindədir. Rusiya Prezidenti Vladimir Putin ötən gün son açıqlamasında bildirdi ki, əgər atəşkəs müddətində Ukrayna Ordusuna yeni əsgərlər qəbul edilməyəcək və Ukraynaya silah tədarükü dayandırılacaqsa, atəşkəs qəbul edilə bilər. ABŞ və Ukraynanın bu şərti qəbul edib-etməyəcəyi bəlli deyil. Bu səbəbdən düşünürəm ki, bu il ərzində müharibə bitəcək, lakin bundan əvvəl müəyyən müddət daha şiddətli şəkildə davam edəcək".
Fatimə Məmmədova
17:00 14.03.2025
Oxunuş sayı: 11086
