Beynəlxalq Olimpiya Komitəsi Rusiya idmançılarının Olimpiadaya buraxılmasını tələb edib
Beynəlxalq Olimpiya Komitəsi rusiyalı idmançılara qarşı tətbiq edilən qadağaların yenidən nəzərdən keçirilməsini tövsiyə edib.
Crossmedia.az xəbər verir ki, Beynəlxalq Olimpiya Komitəsinin hazırkı prezidenti Tomas Bax hökumətlərlə idmançıların eyniləşdirilməsinin yanlış yanaşma olduğunu bildirib. O, 2026-cı il Qış Olimpiya Oyunlarında rusiyalı idmançıların iştirakına icazə verilməli olduğunu deyib.
Xatırladaq ki, 2024-cü ildə Paris Olimpiadasında Rusiya bütün komanda idman növlərindən kənarlaşdırılmışdı. Bu səbəbdən ölkənin xüsusilə də Rusiya prezidenti Vladimir Putinin sevimli idman növü olan xokkeyə geri dönüşü qeyri-müəyyən olaraq qalır.
Qeyd edək ki, Rusiyanın 2026-cı ildə Olimpiadada iştirak edib-etməyəcəyi Beynəlxalq Olimpiya Komitəsinin növbəti rəhbərindən asılı olacaq. Lakin T. Baxın rəhbərlik etdiyi qurum artıq qış idman növləri üzrə federasiyalara qadağaları yenidən nəzərdən keçirməyi tövsiyə edib: "Olimpiya hərəkatının əsas missiyası birləşdirməkdir. Qış idman növləri federasiyaları bu məsələni çox diqqətlə araşdırmalıdırlar".
Xumar Əhmədova
23:55 08.03.2025
Oxunuş sayı: 1552
