İngiltərədə Rusiya casus şəbəkəsi ifşa olundu – Jurnalistlər və hərbi bazalar hədəfdə
London məhkəməsi Britaniyada fəaliyyət göstərən Rusiya casusluq şəbəkəsinin üç üzvünü təqsirli bilib.
Crossmedia.az xarici mediaya istinadən xəbər verir ki, şəbəkənin lideri kimi tanınan Orlin Russevin otel otağından müşahidə avadanlığı tapılıb.
Casusların jurnalistləri izlədiyi, hərbi bazalarda casusluq etdiyi və rusiyalı dissidenti qaçırmağı planlaşdırdığı məlum olub.
Böyük Britaniyada fəaliyyət göstərən Rusiya casus şəbəkəsinə aid olan üç Bolqarıstan vətəndaşı – Katrin İvanova, Vanya Qaberova və Tihomir İvançev Londonda keçirilən məhkəmə prosesində təqsirli bilinib. Onlar üç il ərzində jurnalistləri hədəfə almaq və məxfi məlumatları Rusiyaya ötürməkdə ittiham olunublar.
Casus şəbəkəsinin izi otel otağında tapıldı
Şəbəkənin lideri olduğu deyilən Orlin Russevin İngiltərənin Yarmut şəhərindəki otel otağında dəyəri 8 milyon manatdan çox olan müşahidə avadanlığı aşkarlanıb.
O, Rusiya Federal Təhlükəsizlik Xidməti (FSB) ilə əlaqələri bilinən avstriyalı fırıldaqçı Yan Marselek ilə əlaqədə olub.
Məqsədləri jurnalistləri və hərbi bazaları izləmək olub
İstintaq zamanı məlum olub ki, casuslar saxta şəxsiyyətlərdən istifadə edərək Avropada fəaliyyət göstərib, pilotsuz təyyarələrlə hərbi bazaları izləyib və tanınmış jurnalistləri hədəfə alıblar. Onların Skripal zəhərlənməsini araşdıran araşdırmaçı jurnalist Xristo Qrozevi qaçırmaq planları qurduğu və bu məqsədlə avtomobilinə izləmə cihazı yerləşdirməyə çalışdığı ortaya çıxıb.
Casuslar ictimaiyyətdən gizlənmək üçün sadə həyat sürüblər
Casusların Londonda adi vətəndaşlar kimi yaşadıqları məlum olub. Qaberova gözəllik salonu işlədən estetik mütəxəssis, İvançev rəssam və dekorativ işlər üzrə mütəxəssis, İvanova isə laboratoriya işçisi olub.
London Polis Departamenti bildirib ki, bu casusluq hadisəsi dövlətlər tərəfindən autsorsing edilən yeni casusluq modellərinin nümunəsidir. Məhkəmə müttəhimləri yekdilliklə məhkum edib və onların 14 ilə qədər həbs cəzası alacağı gözlənilir.
03:50 09.03.2025
Oxunuş sayı: 9764
