Suriyada gərginlik artır: Prezident Əl-Şara Əsəd tərəfdarlarına təslim ol çağırışı etdi
Suriyada prezident Əhməd əl-Şara, devrilmiş Bəşər Əsədə sadiq qüvvələrin ölkədə təhlükəsizliyi pozduğunu bildirərək, onları silahlarını yerə qoymağa və təslim olmağa çağırıb.
Crossmedia.az xarici mətbuata istinadən xəbərinə görə, prezident Əl-Şara xalqa videomüraciətində bildirib ki, bu qruplar Suriya xalqına, xəstəxanalara və təhlükəsizlik qüvvələrinə hücum edərək ölkədə xaos yaratmağa çalışır. “Siz onilliklər ərzində Suriya qanını tökmüsünüz. Biz bağışlamağı seçsək də, siz eyni yolu davam etdirirsiniz. Silahlarınızı yerə qoyun və təslim olun”, – deyə o vurğulayıb.
Latakiya və Tartusda hökumət qüvvələri ilə Əsədə sadiq silahlı qruplar arasında şiddətli toqquşmaların davam etdiyi bildirilir. Sahil bölgəsində təhlükəsizlik tədbirləri gücləndirilib, əlavə qüvvələr göndərilib və əsas yollar bağlanıb.
Əl-Şara təhlükəsizlik qüvvələrinə mülki əhaliyə qarşı pozuntulara yol verməmək barədə xəbərdarlıq edərək, “Məhbuslara qarşı zorakılıq qəbulolunmazdır, çünki bu, nə qanunlarımıza, nə də insani dəyərlərimizə uyğundur”, – deyə əlavə edib.
Hökumət Latakiya və Tartusda nəzarətin təmin edildiyini və əməliyyatların davam etdiyini açıqlayıb.
Əl-Şara ölkənin sabitliyini qorumaqda israrlı olduqlarını bildirərək, “Suriya irəliləyir və bir addım da geri çəkilməyəcək”, – deyə vurğulayıb.
21:24 08.03.2025
Oxunuş sayı: 1566
