AB Türkiyə ilə müdafiə əməkdaşlığını genişləndirir
Avropa İttifaqı (Aİ) Türkiyə ilə müdafiə sahəsində əməkdaşlığı artırmaq niyyətindədir. Türükiyə prezidenti Rəcəb Tayyib Ərdoğanın da qatıldığı həmfikir ölkə liderlərinin onlayn görüşündən sonra Aİ Şurasının sədri Antonio Kosta NATO ilə əməkdaşlığın həyati əhəmiyyət daşıdığını və koordinasiyanın davam edəcəyini bildirib.
Crossmedia.az türk mediasına istinadən xəbər verir ki, Brüsseldə keçirilən Ukrayna və Avropa müdafiə sammitinin nəticələri ilə bağlı Kosta, İngiltərə baş naziri Keir Starmer, Kanada baş naziri Castin Trudeau, Norveç baş naziri Jonas Gahr Store və İslandiya baş naziri Kristrun Mjoll Frostadottirə videokonfrans vasitəsilə məlumat verib.
O, Avropanın təhlükəsizliyini təmin etmək üçün həm NATO, həm də Atlantikanın o tayındakı müttəfiqlərlə birgə işləməyin vacibliyini vurğulayıb.
Aİ Komissiyasının sədri Ursula fon der Leyen isə “Avropanın yenidən silahlanması” adlı yeni müdafiə planı ilə bu sahədə səylərin artırılacağını açıqlayıb.
Görüşdə Aİ-nin Xarici İşlər və Təhlükəsizlik Siyasəti üzrə Ali Nümayəndəsi Kaja Kallas da iştirak edib.
Aİ rəsmiləri bildiriblər ki, tərəfdaşlar Ukraynaya dəstək və müdafiə sahəsində əməkdaşlığın gücləndirilməsi üçün birgə səylər göstərməyə davam edəcəklər.
NATO-nun bu prosesdə əsas rol oynadığı və bütün səyləri tamamlamalı olduğu vurğulanıb.
Kosta bu formatda koordinasiyanı davam etdirməyə hazır olduğunu bəyan edib.
Aİ Şurasının yekun bəyanatında isə "Həmfikir qeyri-Aİ tərəfdaşları ilə birgə işləməyin vacibliyi" xüsusi qeyd olunub.
20:43 08.03.2025
Oxunuş sayı: 7146
