Kanada ABŞ mallarına yeni tariflərin tətbiqini dayandırdı
Kanada hökuməti ABŞ-dan idxal edilən 4 mindən çox məhsula tətbiq olunması planlaşdırılan ikinci mərhələ tariflərini 2 aprelədək təxirə salıb.
Crossmedia.az xəbər verir ki, bu barədə Kanadanın maliyyə naziri Dominik Leblan sosial şəbəkə X hesabında məlumat verib.
Nazirin sözlərinə görə, ABŞ, USMCA (ABŞ, Meksika və Kanada arasındakı ticarət sazişi) çərçivəsində Kanadadan ixrac edilən mallara tariflərin tətbiqini 2 aprelədək dayandırmağa razılaşıb. “Bunun nəticəsində, Kanada 125 milyard dollar dəyərində ABŞ mallarına ikinci dalğa tarifləri tətbiq etməyəcək. Bununla yanaşı, biz bütün tariflərin ləğvi üzərində işləməyə davam edirik”, – deyə Leblan bildirib.
Bu qərar, ABŞ prezidenti Donald Trampın imzaladığı sərəncamın ardından qəbul edilib. Həmin sərəncama əsasən, Meksika və Kanadadan gətirilən mallar qeyri-qanuni immiqrasiya və fentanilin izlənməsi ilə əlaqədar tətbiq edilən 25%-lik rüsumlardan 2 aprelədək azad edilib.
Kanada hökuməti ABŞ ilə tariflərin tam ləğvi üçün danışıqları davam etdirdiyini bildirib.
Mədinə Cəlilova
21:21 07.03.2025
Oxunuş sayı: 7826
