Gürcüstan rəsmiləri Avropanı ölkənin daxili işlərinə müdaxilədə ittiham edib
Gürcüstan hakimiyyəti Avropa ölkələrinin səfirlərinin məhkəmə proseslərində iştirakını ölkənin məhkəmə sisteminə siyasi müdaxilə kimi qiymətləndirib.
Crossmedia.az xəbər verir ki, Baş nazir İrakli Kobaxidze bildirib ki, Gürcüstan Konstitusiyasına və beynəlxalq konvensiyalara əməl olunmalıdır: "Təəssüf ki, bu günə qədər bu prinsiplərə riayət olunmayıb. Ümid edirəm ki, gələcəkdə bu vəziyyət düzələcək".
Parlament sədri Şalva Papuaşvili isə Avropa diplomatlarının məhkəmələrdə iştirakını təzyiq vasitəsi adlandırıb:
"Bu, Gürcüstan ədalət sisteminə təzyiq və hakimlərin qorxudulması məqsədi daşıyır. Bu, beynəlxalq hüququn kobud şəkildə pozulmasıdır".
Qeyd edək ki, Litva və Fransa səfirləri polisə hücumda ittiham olunan müxalif “Netgazeti” və “Batumelebi” nəşrlərinin təsisçisi Mziya Amaglobelinin məhkəmə prosesində iştirak ediblər.
Xumar Əhmədova
21:10 07.03.2025
Oxunuş sayı: 7236
