“Krokus Siti Hall” terror aktının təşkilində şübhəli bilinən şəxsə ABŞ-də ittiham irəli sürüldü
"Krokus Siti Hall" terror aktının təşkilində şübhəli bilinən Məhəmməd Şərifullaya rəsmi ittiham irəli sürülüb. O, dindirilmə zamanı hücumu həyata keçirən şəxsləri təlimatlandırdığını etiraf edib.
Crossmedia.az xəbər verir ki,bu barədə xarici KİV yazıb.
ABŞ Ədliyyə Nazirliyinin məlumatına görə, "Cəfər" ləqəbli Şərifulla İŞİD-Xorasan terror qruplaşmasının üzvüdür. Qruplaşma 2024-cü il martın 22-də Moskvanın "Krokus Siti Hall" konsert zalında törədilmiş terror aktına görə məsuliyyəti öz üzərinə götürüb. Həmin hücum nəticəsində 145 nəfər, o cümlədən uşaqlar həlak olub, 550-dən çox insan yaralanıb.
Qeyd edək ki, Şərifulla ifadəsində terrorçulara silahlardan, xüsusilə tüfənglərdən istifadə qaydalarını öyrətdiyini və Moskva hücumuna görə saxlanılanlar arasında öz tələbələri olduğunu etiraf edib.
Bundan əlavə, o, 2021-ci il avqustun 26-da Kabildəki hava limanında törədilən terror aktına da bağlılığı olduğu iddia edilir. Həmin hücumda 13 amerikalı hərbçi və 160-a yaxın dinc sakin həlak olub. Şərifullaya terror təşkilatına maliyyə və dəstək verməkdə ittiham irəli sürülüb. Nəticədə onun fəaliyyətinin çoxsaylı insan tələfatına səbəb olduğu bildirilib.
Xumar Əhmədova
02:31 08.03.2025
Oxunuş sayı: 10403
