İsrail Qəzzaya hücum etdi: Ölənlər var
Atəşkəsə baxmayaraq, İsrail ordusunun Qəzzanın şərqindəki Şücaiyyə məhəlləsinə pilotsuz uçan aparatla hücumu nəticəsində iki fələstinli həlak olub, bir neçə nəfər yaralanıb.
Crossmedia.az WAFA xəbər agentliyinə istinadən bildirir ki, hücum Əl-Mötəsim məscidi yaxınlığında, Mənsura küçəsində baş verib.
Həlak olan şəxslərin Ala İmad Eslim və Muhammed Subhi Eslim olduğu bildirilib.
Bundan əvvəl, martın 2-də İsrail ordusu Şücaiyyə məhəlləsində evlərini görmək üçün qayıdan fələstinliləri hədəfə almış, nəticədə üç nəfər həyatını itirmişdi.
Yanvarın 19-da qüvvəyə minən atəşkəs və əsir mübadiləsi razılaşmasının 42 günlük birinci mərhələsi martın 1-də başa çatıb. Lakin İsrailin baş naziri Benyamin Netanyahu fevralın 3-də başlamalı olan danışıqların ikinci mərhələsinə mane olmaqda ittiham edilir.
Həmçinin martın 2-də İsrail Baş nazirinin dəftərxanası Netanyahunun Qəzza zolağına humanitar yardımların girişini dayandırmağa qərar verdiyini açıqlayıb.
O, atəşkəs və məhbus mübadiləsinin ikinci mərhələsinə keçmək əvəzinə birinci mərhələnin Ramazan ayının sonuna qədər uzadılmasını istəyir.
Xatırladaq ki, İsrailin 2023-cü il oktyabrın 7-dən atəşkəsə qədər həyata keçirdiyi hücumlar nəticəsində 17.881-i uşaq, 12.316-sı qadın olmaqla, ümumilikdə 48.446 fələstinli həlak olub, 111.852 nəfər yaralanıb.
Dağıntılar altında hələ də minlərlə insanın olduğu bildirilir.
Xəstəxanalar və təhsil müəssisələri də daxil olmaqla, mülki infrastruktur ciddi zərər görüb.
Atəşkəsə baxmayaraq, İsrailin razılaşmanı tez-tez pozduğu bildirilir.
18:06 07.03.2025
Oxunuş sayı: 3411
