ABŞ-nin HƏMAS ilə birbaşa danışıqları İsraili narahat edir
ABŞ-ın Qəzza zolağında atəşkəsin uzadılması və məhbus mübadiləsi ilə bağlı HƏMAS ilə birbaşa danışıqlar aparması İsrailin narahatlığına səbəb olub. Təl-Əviv rəhbərliyi Vaşinqtondan bu cür addımları İsraillə məsləhətləşmədən atmaqdan çəkinməsini tələb edib.
Crossmedia.az İsrailin Walla saytına istinadən xəbər verir ki, ABŞ-nin girov məsələləri üzrə xüsusi nümayəndəsi Adam Boehler ilə İsrailin strateji işlər naziri Ron Dermer arasında keçirilən görüşdə İsrail tərəfi ABŞ-nin HƏMAS ilə birbaşa razılaşma əldə etməsinə qarşı olduğunu açıq şəkildə ifadə edib.
İsrailin baş naziri Benyamin Netanyahunun açıq tənqiddən çəkinməsinə baxmayaraq, onun komandasının ABŞ-nin bu addımına görə “çox narahat olduğu” bildirilir. ABŞ isə danışıqlar zamanı HƏMAS-a “İsrailli-Amerikalı girovların azad edilməsi müqabilində Donald Trampın uzunmüddətli atəşkəs üçün təzyiq göstərə biləcəyi” mesajını verib.
ABŞ prezidenti Donald Trampın Yaxın Şərq üzrə xüsusi nümayəndəsi Stiv Vitkoffun açıqlamasına görə, Qəzzada girov saxlanılan ABŞ-İsrail vətəndaşı Edan Aleksandrın azad edilməsi Ağ Ev üçün “əsas prioritet” hesab olunur. Vitkoff vurğulayıb ki, HƏMAS-ın bu addımı humanitar jest kimi qiymətləndiriləcək və ona siyasi üstünlük qazandıracaq.
Digər tərəfdən, İsrail martın 2-dən etibarən Qəzzaya humanitar yardımın girişini dayandıracağını açıqlayıb.
Bununla belə, ABŞ-nin Girov Məsələləri üzrə Xüsusi Nümayəndəsi Adam Boehlerin Qətərdə HƏMAS rəsmiləri ilə görüşərək məhbusların azad edilməsini müzakirə etdiyi bildirilir.
Fələstinli mənbələrin məlumatına görə, bu görüş birinci dəfə baş tutmayıb və HƏMAS rəsmiləri atəşkəs razılaşmasının ikinci mərhələsinə keçməyin vacibliyini vurğulayıblar.
Ağ Evin sözçüsü Karoline Leavitt də ABŞ-nin bu məsələdə birbaşa danışıqlar apardığını təsdiqləyib.
17:41 07.03.2025
Oxunuş sayı: 9420
