Türkiyə Latakiyada baş verən hadisələrlə bağlı mövqeyini açıqladı
Türkiyə Xarici İşlər Nazirliyinin rəsmi nümayəndəsi Öncü Keçeli Suriyadakı son hadisələri şərh edərək, Ankaranın Suriya xalqının sülh və rifah içində yaşamaq hüququnun pozulmasına qarşı olduğunu bildirib.
Crossmedia.az xəbər verir ki, bu barədə Türkiyə XİN-in "X" sosial şəbəkəsindəki rəsmi səhifəsində məlumat paylaşılıb.
Diplomat qeyd edib ki, Türkiyə Suriya xalqına və hökumətinə dəstək verməyə sadiqdir. Onun sözlərinə görə, Ankara Suriyada və regionda sülhə təhdid yarada biləcək hər cür təxribatın qarşısının alınmasını vacib hesab edir.
Keçeli əlavə edib ki, hazırda Suriyada təhlükəsizliyin və sabitliyin təmin edilməsi üçün intensiv səylər göstərilir. Onun xəbərdarlığına görə, Latakiya və ətrafındakı gərginlik, eləcə də təhlükəsizlik qüvvələrinə edilən hücumlar, ölkənin birliyi və həmrəyliyi üçün ciddi təhlükə yarada bilər.
Qeyd edək ki, daha əvvəl Suriyanın Latakiya vilayətində təhlükəsizlik qüvvələrinə hücumdan sonra, devrilmiş Bəşər Əsəd rejiminin keçmiş hərbçilərinin tapılması və zərərsizləşdirilməsi üçün genişmiqyaslı əməliyyatların aparıldığı bildirilib.
Fatimə Məmmədova
16:49 07.03.2025
Oxunuş sayı: 2610
