Balıqçılığın inkişafına dair müzakirələr aparılıb
Kənd Təsərrüfatı Nazirliyində “Azərbaycan Balıq İstehsalçıları və Emalçıları Assosiasiyası” İctimai Birliyinin nümayəndələri ilə görüş keçirilib.
Crossmedia.az nazirliyə istinadən xəbər verir ki, görüşdə qurumun Aparatının məsul şəxsləri, balıqçılıq müəssisələrinin rəhbərliyi və əməkdaşları iştirak ediblər.
Tədbirdə çıxış edən nazirin müşaviri Zaur Əliyev Prezident İlham Əliyevin ötən il dekabrın 19-da “Balıqçılığın və akvakulturanın inkişafı ilə bağlı əlavə tədbirlər və bununla əlaqədar bəzi fərman və sərəncamlarında dəyişiklik edilməsi haqqında” fərman imzaladığını xatırladıb, fərmandan irəli gələn məsələlərin həlli ilə bağlı görülən işlər, balıqçılıq sektoru üçün nəzərdə tutulan institusional struktur, nazirliyinin tabeliyindəki Balıqçılıq və Akvakultura Mərkəzinin hədəfləri və üzərinə düşən vəzifələr barədə məlumat verib.
Assosiasiyanın sədri Zaur Salmanlı bildirib ki, əsas məqsəd ölkədə təbii resurslardan səmərəli istifadə olunmaqla balıqçılığın inkişafı, balıqçılıq təsərrüfatında yeni texnologiyaların istifadəsi və ekoloji tarazlığın qorunmasına nail olmaqdır. O, balıqçılıq sahəsində xidmətlərin, müasir texnika və avadanlıqlar ilə təminatın təşkili, rəqabətə davamlı və ekoloji təmiz məhsulların istehsalının vacib olduğunu diqqətə çatdırıb.
Görüşdə balıqçılıq və akvakulturanın inkişaf etdirilməsi, o cümlədən məhsuldarlığın yüksəldilməsi, bu sahədə idarəetmə-nəzarət sisteminin təkmilləşdirilməsi, ətraf mühitə təsiri nəzərə alınmaqla balıq resurslarının formalaşdırılması, habelə balıq ovunun və akvakultura təsərrüfatlarının müasir tələblərə uyğun təşkil edilməsi və tənzimlənməsi, balıqçılıqda vergi sistemi və dəstək mexanizmləri, balıqçılıq və akvakulturanın yerli və qlobal dəyər zəncirlərinə inteqrasiyasının təşviq edilməsi məsələləri müzakirə edilib.
Tədbir iştirakçıları balıqçılıq və akvakulturanın inkişafına dair fikirlərini bölüşüblər. Görüşdə ölkədə bu sahənin inkişafı məqsədilə qarşıya qoyulan vəzifələrə toxunulub, assosiasiya üzvlərinin səsləndirdiyi təkliflər qeydə alınıb, dövlət-özəl əməkdaşlığının daha da inkişaf etdirilməsi, balıqçılıq və akvakultura sahələrində qanunvericiliyinin təkmilləşdirilməsi istiqamətində fermer və sahibkarların rəy və təkliflərinin öyrənilməsi üçün görüşlərin davam etdiriləcəyi iştirakçıların diqqətinə çatdırılıb.
Daha sonra “Azərbaycan Balıq İstehsalçıları və Emalçıları Assosiasiyası”nın ümumi yığıncağı keçirilib, gündəlikdəki cari məsələlər müzakirə edilib.
16:30 07.03.2025
Oxunuş sayı: 3149
