Tramp: “NATO-ya ödəniş etməsələr, onları müdafiə etməyəcəyəm”
ABŞ Prezidenti Donald Tramp NATO və Avropanın müdafiə məsələləri ilə bağlı sərt açıqlamalar verib. Ağ Evdə jurnalistlərin suallarını cavablandıran Tramp Avropa müttəfiqlərinin müdafiə xərclərini artırmalı olduğunu vurğulayıb.
"Bu, sağlam məntiqdir. Ödəməsələr, mən də onları müdafiə etməyəcəyəm", – deyə Tramp NATO üzrə tərəfdaş ölkələrə xəbərdarlıq edib.
Eyni zamanda, o, Fransa Prezidenti Emmanuel Makronun Avropa ölkələrinə nüvə müdafiəsi təmin etmə ehtimalı barədə açıqlamalarına münasibət bildirib və bunun əvəzinə “denuklearizasiya”nı dəstəklədiyini qeyd edib.
"Son bir neçə gündə Ukrayna və Rusiya ilə bağlı çox irəliləyiş əldə etmişik. Bu məsələnin həll olunması yaxşı olardı ki, biz artıq nüvə təhlükəsi barədə danışmayaq", – Tramp vurğulayıb.
Bundan əlavə, ABŞ-yə sığınan 240 min ukraynalının müvəqqəti hüquqi statusunun ləğv ediləcəyi ilə bağlı yayılan xəbərlərə toxunan Tramp məsələnin araşdırıldığını təsdiqləyib.
"Biz onlara zərər vermək istəmirik, xüsusilə də ukraynalılara. Onlar artıq kifayət qədər əziyyət çəkiblər", – deyə o əlavə edib.
Nigar Yahyazadə
13:40 07.03.2025
Oxunuş sayı: 9062
