Deputatdan müjdə: "Yaxın vaxtda sülh sazişi imzalana bilər"
Ermənistanın baş naziri Nikol Paşinyan ölkə konstitusiyasının preambulasında yer alan müstəqillik bəyannaməsinə istinadın əvəzlənməsi ilə bağlı təklifi keçiriləcək referenduma çıxarmağı planlaşdırır.
Bu barədə "Hraparak" qəzeti hakim "Vətəndaş sazişi" partiyasındakı mənbələrə istinadən yazıb.
Bildirilib ki, dəyişiklik nəticəsində onun müəllifi olduğu “Real Ermənistan” layihəsindən istifadə olunacaq.
Nəşrin məlumatına görə, Paşinyan geniş siyasi dəstək olmayacağı halda belə, bu planı həyata keçirməkdə qərarlıdır.
Məlum olduğu kimi, Paşinyan 2024-cü ilin sentyabrında Azərbaycanla sülh sazişinin bağlanması üçün Ermənistan konstitusiyasına dəyişiklik edilməsinin mümkün olduğunu bildirib.
Bu il fevralın 19-da isə Paşinyan vətəndaşlara müraciətində Ermənistanın yeni konstitusiyasının qəbul edilməsi üçün ümumxalq referendumunun keçirilməsinin vacibliyini bəyan edib. Baş nazir Ermənistan hakimiyyətinin daha əvvəl irəli sürdüyü “Real Ermənistan” ideologiyası layihəsini təqdim edib.
Hökumət nümayəndələri 2026-cı ildə keçiriləcək parlament seçkilərinə qədər Konstitusiyanın yeni mətninin hazırlanması ilə bağlı planların olduğunu bildiriblər.
Milli Məclisin deputatı Məlahət İbrahimqızı son proseslər fonunda Crossmedia.az-a müsahibə verib. Müsahibəni təqdim edirik:
- Ermənistan baş naziri Nikol Paşinyanın konstitusiya dəyişikliyi barədə səsləndirdiyi fikirləri necə qiymətləndirirsiniz? Bu, Azərbaycanın növbəti diplomatik qələbəsi kimi qəbul edilə bilərmi?
- Sözsüz, belədir. Paşinyan əvvəllər də konstitusiya dəyişikliyi barədə oxşar fikirlər səsləndirsə də, həmişə geri çəkilib. Bunun əsas səbəblərindən biri Fransanın təzyiqidir. Hər dəfə Paşinyanın "başından vurublar". Son zamanlar isə o, daha qərarlı görünür. Bəyanatlarında sistemlilik, davamlılıq müşahidə olunur. Bu, əlbəttə, rəsmi Bakının qətiyyətinin təzaharüdür. İkinci bir tərəfdən, rəsmi İrəvan reallığı anlayır. Məsələ burasındadır ki, Fransa kimi dövlətlərin "ipi ilə quyuya düşmək" Ermənistanı daha çətin vəziyyətə salır. Odur ki, Paşinyan xalqını inandırmaq istəyir ki, Azərbaycanın şərtlərini yerinə yetirməsə, erməni xalqının gələcək taleyi olmayacaq.
- Yəni referendum olacaq?
- Düşünürəm ki, bəli. Yaxın vaxtda referendumn vaxtı elan ediləcək. Bunun alternativi yoxdur. Prezident İlham Əliyev hələ 2019-cu ildə Soçidə "Valday" Beynəlxalq Diskussiya Klubunun iclasının plenar sessiyasında dedi ki, Qarabağ Azərbaycandandır, nida. Biz bu nidanı Xankəndidə keçirdiyimiz antiterror əməliyyatında, regiounumuzda separatizmə tamamilə son qoymaqda göstərdik. Bu, Ermənistan üçün yaxşı dərs oldu. Ümumiyyətlə, erməni ideologiyasının, revenşizm ab- havasınının sonu yoxdur.
- Məlahət xanım, bəs Zəngəzur dəhlizinin taleyi barədə nə düşünürsünüz?
- Rusiyanın xarici işlər naziri Sergey Lavrov bu günlərdə Türkiyədə idi. O, həmkarı Hakan Fidanla keçirdiyi mətbuat konfransında dedi ki, regional kommunikasiyalar açılmalıdır. Rusiyanın baş diplomatı, sözsüz ki, Zəngəzur dəhlizinin açılmasını nəzərdə tuturdu. Bu, bütün regionun xeyrinə olacaq addımdır.
- Paşinyan hər nə qədər sülh barədə danışsa da, bəzən destruktiv mövqe də ortaya qoyur. Bu ziddiyyətli məqam perspektiv üçün nə vəd edir?
- Ermənistanın konstitusiyasını dəyişməsi əslində kifayət deyil. Həm də Rusiyanın vasitəçiliyi ilə imzalanan 9 noyabr üçtərəfli bəyanatının şərtləri yerinə yetirməlidir. Bu şərtlərdən biri də məhz Zəngəzur dəhlizinin açılmasıdır. Əgər rəsmi İrəvan bunları etsə, sülh sazişi də yaxın zamanda imzalanacaq. Bu, Ermənistanın gələcəyi üçün ən yaxşı yoldur.
- Mümkün sülh ATƏT-in Minsk Qrupunun mövcudluğuna necə təsir edəcək?
- Sülh sazişi imzalansa, Minsk Qrupu avtomatik ləğv olunacaq. Paşinyan özü də son zamanlar bu barədə müsbət mesajlar verib.
- Bəs Avropa İttifaqının monitorinq missiyası?
- Sözsüz ki, onların da fəaliyyətinə son qoyulacaq. Bütün bu addımların hər birində Azərbaycan xalqı Prezident İlham Əliyevin yanında olacaq.
- Yeri gəlmişkən, PKK terror təşkilatının həbsdə olan lideri Abdullah Öcalan tərəfdarlarına silahı yerə qoymaqla bağlı çağırış edib. Bu çağırışın Türk dünyası üçün əhəmiyyəti nədən ibarətdir?
- Beləliklə, PKK-nın varlığına son qoyuldu. Onlar xaricdən dəstəklənirdilər. Eyni zamanda Türkiyə daxilində də satqınlar var idi. PKK-nın tərkibində erməni terrorçuları da fəaliyyət göstərirdi. Öcalanın bu çağırışı həm də Türk dünyasının qələbəsidir.
Kənan Novruzov
16:20 28.02.2025
Oxunuş sayı: 24451
