Rusiya Aİ-nin Ukrayna üzrə danışıqlar aparmaq təşəbbüsünü şərtlə dəstəkləyib
Rusiya Avropa İttifaqının (Aİ) Ukrayna münaqişəsi üzrə danışıqlar aparmaq üçün xüsusi nümayəndə təyin etməsini, həmin şəxsin sülh yolu ilə nizamlanmağa çalışacağı təqdirdə, müsbət qarşılayacağını bildirib.
Crossmedia.az xəbər verir ki, bu barədə “TASS” agentliyi Rusiya Prezidentinin mətbuat katibi Dmitri Peskova istinadən məlumat yayıb.
Peskov bu fikirləri Finlandiya Prezidenti Aleksandr Stubbın mümkün danışıqlar nümayəndəsi təyin olunacağı ilə bağlı yayılan xəbərləri şərh edərkən səsləndirib.
Kremlin sözçüsü bildirib ki, Aİ danışıqlar aparacaq nümayəndənin təyin olunmasından uzun müddətdir danışsa da, bu istiqamətdə konkret addımlar atmır.
“Aİ bunu çoxdan istəyir, lakin ya bacarmır, ya da qərar verməyə cəsarət etmir. Bunu konstruktiv mövqe adlandırmaq çətindir”, – deyə Peskov qeyd edib.
O, danışıqlar üzrə xüsusi nümayəndənin olmasını müsbət qiymətləndirib və həmin şəxsin sülh yolu ilə nizamlanmaya səmimi şəkildə töhfə verməyə çalışmasının daha yaxşı olacağını vurğulayıb.
10:56 25.10.2026
Oxunuş sayı: 56
