ADA-nın şagirdi Beynəlxalq Riyaziyyat Yarışmasının Qlobal Mərhələsində qızıl medal qazanıb
ADA Məktəbinin şagirdi Cüneyd Qənbərov Beynəlxalq Riyaziyyat Yarışmasının (“International Math Challenge – IMC”) Qlobal Mərhələsində qızıl medal qazanıb. Yarışın final mərhələsi Tailandın "Chulalongkorn" Universitetində keçirilib.
Cüneyd öz kateqoriyasında dünyanın 71 ən güclü iştirakçısı arasında 7-ci yerə layiq görülüb.
Qeyd edək ki, builki "IMC"-də 140 ölkədən 10 mindən çox şagird iştirak edib. Onların arasından yalnız ən yaxşı nəticəni göstərən 45 faiz iştirakçı finala vəsiqə qazanıb.
ADA Məktəbinin riyaziyyat müəllimi Burhan Ondar Baraziyə təşəkkürünü bildirən Cüneyd əlavə edib ki, bu uğurunda öz şəxsi səyi, davamlı hazırlığı ilə yanaşı, məktəbdə qazandığı bilik və bacarıqların, eləcə də müəllimlərinin rolu böyükdür.
Xatırladaq ki, ADA Məktəbi daim şagirdləri öz bilik və bacarıqlarını beynəlxalq platformalarda sınamağa həvəsləndirir, onların elmi potensialının inkişafına dəstək göstərir, bu məzmunlu uğurları Azərbaycanın akademik müstəvidə tanınması üçün faydalı bir vasitə kimi qiymətləndirir.
12:04 25.02.2025
Oxunuş sayı: 9636
