Elmə və ədəbiyyata marağın artırılması məqsədilə siyəzənli gənclərlə görüş keçirilib
Siyəzəndə gənc nəslin ədəbiyyata, elmə və təhsilə marağını artırmaq, kitab oxumaq mədəniyyətini təbliğ etmək məqsədilə "Məktəb, elm və ədəbiyyat" mövzusunda görüş keçirilib.
Azərbaycan Milli Elmlər Akademiyasının Nizami Gəncəvi adına Ədəbiyyat İnstitutu, Siyəzən Rayon İcra Hakimiyyəti və Quba-Xaçmaz Regional Təhsil İdarəsinin təşəbbüsü ilə keçirilən tədbirdən əvvəl iştirakçılar rəsm əsərlərindən ibarət sərgi ilə tanış olublar.
Tədbirdə Azərbaycan Milli Elmlər Akademiyasının prezidenti akademik İsa Həbibbəyli, Milli Məclisin Elm və təhsil komitəsinin sədri professor Anar İskəndərov, filologiya elmləri doktoru, deputat Elnarə Akimova, uşaq ədəbiyyatı yazıçısı Zahid Xəlil, Siyəzən Rayon İcra Hakimiyyətinin başçısı Novruz Novruzov, Quba-Xaçmaz Regional Təhsil İdarəsinin müdiri Coşqun Əliyev və başqaları çıxış edərək Azərbaycanda ədəbiyyatşünaslıq elminin və ədəbiyyatın inkişafı sahəsindəki nailiyyətlərdən bəhs edib, həmçinin regionlarda elmin, təhsilin və bədii yaradıcılığın inkişafında ziyalıların üzərinə düşən vəzifələrdən danışıblar. Bildirilib ki, elm və təhsilin inteqrasiyası, elmin populyarlaşdırılması qloballaşan dünyada müasir dövrün əsas tələblərindəndir. Elmi kadr potensialının inkişafını sürətləndirmək və gənclərin elmə marağını artırmaq, onların inteqrasiyası ilə bağlı zəruri informasiya tələbatını təmin etmək məqsədilə daim ciddi islahatların aparılmasına ehtiyac var.
Məktəb direktorları, müəllimlər, mədəniyyət işçiləri, yazıçılar və şagirdlərin iştirak etdiyi görüşdə məktəblilər tərəfindən uşaq ədəbiyyatı yazıçılarının hekayələrindən hazırlanmış səhnəciklər nümayiş olunub.
Alimlər tərəfindən kitabxanaya kitablar hədiyyə edilib, iştirakçılar Siyəzən Rayon İcra Hakimiyyəti tərəfindən fəxri fərmanlarla təltif ediliblər.
10:53 24.02.2025
Oxunuş sayı: 6045
