Ölkəmizdə donuz qripinin yayılma təhlükəsi var? - Səhiyyə Nazirliyindən rəsmi AÇIQLAMA
Son günlərdə qonşu ölkələrdə donuz qripi (H1N1) virusuna yoluxma hallarının artması Azərbaycanda da virusun yayılma riski ilə bağlı narahatlığa səbəb olub. Xüsusilə, sərhəd dövlətlərdə qeydə alınan yeni yoluxma halları diqqəti Azərbaycandakı vəziyyətə yönəldir. Hazırda ölkənin müvafiq qurumları vəziyyəti yaxından izləyir və nəzarət tədbirlərini həyata keçirir. Virusun sürətli yayılma qabiliyyəti əhalidə narahatlıq yaratsa da, Səhiyyə Nazirliyi vəziyyətlə bağlı Crossmedia.az-a rəsmi açıqlama verib.
Səhiyyə Nazirliyinin Mətbuat Xidmətindən bildirilib ki, Azərbaycanda donuz qripi virusu aşkarlanmayıb. Laboratoriyalara daxil olan virus xəstəliklərinə şübhəli şəxslərdən götürülmüş nümunələr üzərində aparılan analizlər nəticəsində donuz qripi təsdiqlənməyib.
Nazirliyin açıqlamasında qeyd olunur ki, Azərbaycanda donuz qripinin yayılmasına qarşı müvafiq hazırlıq tədbirləri görülüb. Ötən ilin sentyabr ayından etibarən qripin spesifik profilaktikası məqsədilə ölkəyə 4 valentli peyvəndlər gətirilib və bu peyvəndlər ambulator tibbi xidmət göstərən tibb müəssisələrində əhaliyə təqdim olunub. Donuz qripinə qarşı qeyri-spesifik qorunma tədbirləri digər respirator virus infeksiyaları ilə eyni prinsiplərə əsaslanır. Bu tədbirlər barədə əhali mütəmadi olaraq məlumatlandırılır və zəruri hallarda daha ciddi əks-epidemik tədbirlərin görülməsi mümkündür.
Bildirilib ki, donuz qripinin spesifik fərqləndirici əlamətləri yoxdur və bu xəstəlik mövsümi qrip kimi özünü göstərir. Özündə respirator xəstəlik əlamətləri hiss edən şəxslərə ilk növbədə özlərini təcrid etmək tövsiyə olunur. Risk qrupuna daxil olan şəxslər dərhal, sağlam insanlar isə üç gündən sonra vəziyyət pisləşərsə və ya fəsadlar yaranarsa həkimə müraciət etməlidirlər. Qrip diaqnozunun dəqiqləşdirilməsi üçün burun-udlaqdan yaxma götürülməsi və xüsusi laboratoriya analizləri aparılması tələb olunur.
Açıqlamada o da vurğulanır ki, qripə qarşı istifadə olunan antiviral dərmanlar yalnız təsdiqlənmiş yoluxma hallarında effektiv olur. Ağır gedişatlı və fəsadlaşmış qrip hallarında xəstələr hava-damcı infeksiyaları üçün nəzərdə tutulmuş infeksion şöbələrdə müalicə olunmalıdırlar.
Səhiyyə Nazirliyi vətəndaşlara şəxsi gigiyena qaydalarına ciddi riayət etməyi, kütləvi tədbirlərdə ehtiyatlı olmağı və sağlamlıq vəziyyətlərində dəyişiklik hiss etdikdə tibbi yardıma müraciət etməyi tövsiyə edir.
Maral Şahverdili
11:06 04.02.2025
Oxunuş sayı: 2508
