Erməni Kilsəsində qalmaqal: II Qaregin Talin keşişini vəzifədən uzaqlaşdırdı
Ermənistan Kilsəsində növbəti gərginlik yaşanır. Katolikos II Qaregin Tade Tahmazyanı Talin şəhərindəki Müqəddəs Məryəm Ana kilsəsinin baş keşişi vəzifəsindən uzaqlaşdırıb. Bu barədə Ermənistan mediası məlumat yayıb.
Crossmedia.az xarici mediaya istinadən xəbər verir ki, məsələ bir müddətdir ki, kilsə mükafatları və intizam məsələləri üzrə komissiyanın gündəliyində idi. Eçmiədzin açıqlamasında bildirilib ki, qərara əsas səbəb kimi “ruhaniyyətin nüfuzdan salınması, ictimai şəkildə böhtan xarakterli çıxışlar və anti-kilsə davranışları” göstərilib.
Məlumata görə, Tahmazyan liturgiya zamanı dəfələrlə nə katolikosun, nə də yeparxiya rəhbərinin adını çəkib və kilsə rəhbərliyinə tabe olmamaqla ittiham olunub. Qərarla birlikdə o, ruhani statusunu itirərək adi vətəndaş kimi - Aramayis Tahmazyan adı ilə tanınacaq.
Keçmiş keşiş Tade Tahmazyan daha əvvəl dəfələrlə bəyan etmişdi ki, II Qaregin-nin rəhbərliyi altında kilsədə “pozğunluq və korrupsiya” hökm sürür. Erməni mediası qərarı “katolikosun ona qarşı çıxan keşişə şəxsi qisası” kimi dəyərləndirir.
Hadisəyə siyasi reaksiya da gəlib. Ermənistan parlamentinin vitse-spikeri Ruben Rubinyan Tahmazyana dəstək verərək bildirib ki, II Qaregin-nin Tade Tahmazyanı baş keşişi vəzifəsindən məhrum etməsi “qanuni qüvvəyə malik deyil”:
“Uzurpator Ktriç Nersisyanın ( II Qaregin ) qərarı heç bir hüquqi əhəmiyyət daşımır. O, katolikos deyil, buna görə də Ter Tade hələ də keşiş sayılır. İstəsə, bütün kilsəni ‘sanasından məhrum etsin’, istəsə, keçmiş prezidentləri və rusiyalı biznesmeni (Samvel Karapetyan) ‘episkop təyin etsin’ - onun qərarlarının heç biri real gücə malik deyil”, - deyə Rubinyan bildirib.
Erməni Kilsəsindəki qalmaqal daha da dərinləşir və ekspertlər yaxın günlərdə yeni qarşıdurmaların yarana biləcəyini istisna etmirlər.
Türkan Kərimli
16:25 03.12.2025
Oxunuş sayı: 560
