Pedaqoji Universitetdə tələbə gənclər mükafatlandırılıb
Azərbaycan Dövlət Pedaqoji Universitetinin (ADPU) rektoru professor Cəfər Cəfərov 2 Fevral – Azərbaycan Gəncləri Günü münasibətilə universitetdə akademik göstəriciyə görə fərqlənən tələbələr, eləcə də tələbə təşkilatlarının fəalları ilə görüşüb.
Crossmedia.az xəbər verir ki, bu barədə ADPU-dan məlumat verilib.
Görüşdə çıxış edən rektor Cəfər Cəfərov gənclərin cəmiyyətimizin inkişafında mühüm rol oynadığını vurğulayıb. Rektor bildirib ki, onların enerjisi, innovativ düşüncəsi və təşəbbüskarlığı ölkəmizin tərəqqisinin əsas hərəkətverici qüvvələrindəndir. Xüsusilə respublika səviyyəli və beynəlxalq tədbirlərin təşkilində gənclərimizin fəal iştirakı sevindiricidir. Qeyd edilib ki, Vətən müharibəsi zamanı gənclərimizin göstərdiyi qəhrəmanlıq nəticəsində ölkəmizin ərazi bütövlüyü bərpa edilib.
C.Cəfərov son illərdə gənclər arasında müəllimlik ixtisaslarına marağın artdığını və yüksək bal toplayan tələbələrin seçim zamanı pedaqoji ixtisaslara üstünlük verdiklərini diqqətə çatdırıb. Universitetdə aparılan islahatlardan - tədrisin məzmun keyfiyyətinin yaxşılaşdırılması, müasir tələblərə uyğun yeni tədris planlarının hazırlanmasından bəhs edən rektor vətənpərvər gələcək nəsillərin yetişdirilməsində müəllimlərin həlledici rollarını xüsusilə qeyd edib, tələbələri zamanın tələbləri ilə ayaqlaşan peşəkar kadrlar kimi formalaşmaq üçün yorulmadan çalışmağa çağırıb.
Daha sonra fakültələr üzrə ötən semestrdə ən yüksək akademik göstəricilər toplamış və universitetdə fəaliyyət göstərən tələbə təşkilatlarının fəaliyyətində fərqlənən tələbələr təltif ediliblər.
Görüş tələbələrin təklif və rəylərinin müzakirəsi ilə davam edib.
18:47 03.02.2025
Oxunuş sayı: 11574
