Qarabağın bərpasına yatırılacaq birgə sərmayələr Türk dünyası üçün vacibdir - türkiyəli ekspert
Azərbaycanın işğaldan azad edilmiş torpaqlarının minalardan təmizlənməsi, Qarabağ və Şərqi Zəngəzurdakı keçmiş məcburi köçkünlərin öz doğma yurdlarına qayıtması bütün regionun təhlükəsizliyi üçün mühüm əhəmiyyət kəsb edir. Ona görə də işğaldan azad edilmiş rayonların infrastrukturunun bərpasında Bakıya hər cür dəstək vermək lazımdır.
Crossmedia.az xəbər verir ki, bu sözləri Mərmərə Universitetinin Tarix kafedrasının professoru İlyas Kemaloğlu Türkiyə, Azərbaycan və Özbəkistan nazirlərinin yanvarın 29-da Ankarada keçirilən üçtərəfli görüşünün yekunlarını jurnalistlərə şərh edərkən deyib.
Onun sözlərinə görə, Azərbaycan torpaqlarının bərpası məsələsi üç türk dövlətinin nazirlərinin danışıqlarının gündəliyinə daxil edilib və yekun Bəyannamədə öz əksini tapıb.
Kemaloğlu əlavə edib: “Tərəflər Azərbaycanın Qarabağ və Şərqi Zəngəzur iqtisadi rayonlarında birgə layihələrin həyata keçirilməsinin və ümumilikdə Bakının dəstəklənməsinin tərəfdarı olduqlarını bildiriblər. Ankara Bəyannaməsinin bu bəndi Türk dünyasının gələcəyi üçün çox önəmlidir”.
Professor diqqəti Azərbaycanın 44 günlük Vətən müharibəsində qazandığı tarixi Qələbənin nəticələrinə çəkərək vurğulayıb ki, Azərbaycan ordusunun uğurları Türk Dövlətləri Təşkilatı (TDT) çərçivəsində türk dövlətlərinin yaxınlaşmasına da töhfə verib.
O deyib: “TDT çərçivəsində birgə addımlar həm Azərbaycanın özünün maraqlarına uyğundur, həm də respublikanın qarşısında duran vəzifələrin həllinə, bütün Türk dünyasında əməkdaşlığın inkişafına töhfə verir”.
Ankara Bəyannaməsi mövzusuna qayıdan Mərmərə Universitetinin professoru bu cür sənədlərin türk ölkələrinin tarixi və mədəni ortaqlığa əsaslanan güclü və qarşılıqlı faydalı strateji tərəfdaşlığının təməlini təşkil etdiyinə əminliyini ifadə edib.
13:25 02.02.2025
Oxunuş sayı: 325
