Azərbaycan səhiyyə sistemində yenilik: Bu sənədlər ləğv olunur
İcbari Tibbi Sığorta üzrə Dövlət Agentliyinin İdarə Heyəti sədrinin müşaviri İsa Əliyev Milli Məclisdə keçirilən “İlkin səhiyyə xidməti: mövcud vəziyyət, görülən işlər, problemlər və onların həlli yolları” mövzusunda dinləmədə söyləyib ki, səhiyyə sistemi ilə bağlı bəzən sənədlər ləğv ediləcək.
"Azərbaycanda səhiyyə sistemi ilə bağlı 15-ə yaxın sənəd var ki, onlar ya tamamilə yenilənməli, ya da müəyyən dəyişikliklər edilməlidir"- deyə qeyd edib.
İcbari Tibbi Sığorta üzrə Dövlət Agentliyinin Mətbuat Xidmətindən ləğv ediləcək sənədlərin nələrlə bağlı olduğu barədə Crossmedia.az-a açıqlama verilib:
“İlkin tibbi sanitariya yardımının təşkili və göstərilməsinə sistemli yanaşmanın tətbiq edilməsi, bu sahə üzrə resursların səmərəli istifadəsi, habelə əhalinin sağlamlıq göstəricilərinin yaxşılaşdırılması üçün müvafiq sənədlərin təkmilləşdirilməsi nəzərdə tutulub. Bu sənədlər ilkin tibbi santitariya yardımı müəssisələrinin tərkibinə aid tələblərin, təhkimolunma qaydalarının yenilənməsi, kadr hazırlığının və səhiyyədə rəqəmsal texnologiyaların tətbiqinin gücləndirilməsi, ailə həkimi ixtisası üzrə vəzifə təlimatlarının işlənilməsi, səlahiyyətlərinin genişləndirilməsi, ixtisas üzrə təlim proqramlarının təkmilləşdirilməsi və digər məsələləri əhatə edir".
Qeyd olunub ki, bütün bunlardan irəli gələrək “İlkin tibbi-sanitariya yardımının təşkili və göstərilmə qaydası”nın qəbul edilməsi sənədlər içərisində mühüm yer tutur”.
Ayhan Ağarzayev
16:32 31.01.2025
Oxunuş sayı: 12525
