Maliyyə Nazirliyi dövlət qurumlarında maaşların gecikməsi ilə bağlı AÇIQLAMA verdi
Son günlər Dövlət Gömrük Komitəsinin (DGK) əməkdaşlarının üç aydır maaş ala bilmədikləri ilə bağlı sosial şəbəkələrdə məlumatlar yayılıb. İşçilər əməkhaqqı gecikməsinin səbəbləri barədə rəsmi açıqlamanın olmamasından narazıdır. DGK sədri Şahin Bağırov bu məsələyə münasibət bildirərək, texniki problemlərin olduğunu və maaşların tezliklə ödəniləcəyini desə də, konkret tarix açıqlanmayıb.
Azərbaycan Avtomobil Yolları Dövlət Agentliyinin (AAYDA) işçiləri də əməkhaqqı gecikməsi ilə üzləşib. Xüsusilə rayonlardakı idarələrdə çalışan əməkdaşlar dekabr və yanvar aylarının maaşlarını hələ də ala bilməyib. Bakıda bəzi idarələrdə maaşların ödənildiyi bildirilir, lakin bölgələrdəki işçilər hələ də gözləyir. Maliyyə çətinlikləri yaşayan işçilər bank kreditlərini ödəyə bilmədiklərini, əlavə faiz və cərimələrlə üzləşdiklərini deyirlər.
Bu maaş gecikmələri ilə bağlı narazılıqların cəmiyyətdə geniş müzakirə olunduğu dövrdə Maliyyə Nazirliyinin, Vergi Xidmətinin və Dövlət Gömrük Komitəsinin birləşdirilməsi ilə bağlı iddiaların ortaya çıxması diqqət çəkib. Bəzi ekspertlər bu prosesin idarəetmədə struktur dəyişikliklərinə yol aça biləcəyini bildirir. Məsələ ilə bağlı rəsmi açıqlama olmasa da, bu iddialar maaş gecikmələri ilə bağlı narahatlıqların artdığı bir vaxta təsadüf edir.
DGK və AAYDA əməkdaşlarının maaşlarının gecikməsi ilə bağlı Maliyyə Nazirliyi Crossmedia.az- ın sorğusuna cavab verib.
Bildirilib ki, adıçəkilən qurumlarda hazırda əməkhaqqı ilə bağlı maliyyələşmədə problem yoxdur.
Nihat Tahirov
12:07 31.01.2025
Oxunuş sayı: 3668
