Fransa ciddi böhranla üzləşə bilər? - AÇIQLAMA
29 yanvar 2025-ci il tarixində Senatda müzakirələr zamanı Fransanın Avropa və xarici işlər naziri Jan Noel Baro növbəti dəfə Azərbaycanın Fransanın dənizaşırı ərazilərinə qondarma müdaxiləsi ilə bağlı iddialar yaymağa cəhd edib.
Azərbaycan Xarici İşlər Nazirliyinin mətbuat katibi Ayxan Hacızadə bu iddialara şərh bildirib. O, Fransa xarici işlər nazirinin anti-Azərbaycan iddialarını qətiyyətlə rədd edir və pisləyirik,- deyə vurğulayıb.
Azərbaycan-Fransa münasibətlərinin gərginlik səviyyəsi olduğu kimi qalmağa davam edir. Fransanın Azərbaycana qarşı siyasəti qeyri-adekvat xarakter daşıyır. Belə ki, Paris Bakıya qarşı ədalətsiz iddialar səsləndirir. Bununla kifayətlənmir Azərbaycanın digər siyasi məsələlərinə qarşı da yanlış aspektdən çıxışlar edir və yerli mövzularına da müdaxilələr edir.
İkitərəfli münasibətlərin perspektivdə hansı yöndə irəliləyəcəyi barədə diplomatik yolla danışıqlar həyata keçirilsə də Fransa tərəfi hər zaman mənfi yöndən özünü göstərməkdən çəkinmir.
Məsələ ilə bağlı Crossmedia.az-a açıqlama verən siyasi şərhçi Kənan Novruzovun fikrincə, dənizaşırı ərazilərdə kolonializmə qarşı mübarizə artıq yeni mərhələyə qədəm qoyub və bunun əsas səbəbi Fransanın müstəmləkəçilik siyasətidir: “Eyni zamanda, Yelisey sarayının daxili və xarici siyasətdəki uğursuzluqları da bu prosesə təsir göstərir. Digər tərəfdən, şübhəsiz ki, Azərbaycanın kolonializmə qarşı mübarizədə göstərdiyi dəstək və beynəlxalq hüquq prinsiplərinə əsaslanaraq atdığı addımlar dənizaşırı ərazilərdə yaşayan xalqları daha da ruhlandırır və onlara ilham verir. Bu, heç bir halda Fransız hakimiyyətinin iddia etdiyi kimi Azərbaycanın Fransanın daxili işlərinə qarışması kimi qəbul edilməməlidir. Azərbaycan heç bir dövlətin daxili işlərinə müdaxilə etmir. Əksinə, Cənubi Qafqazda və dünyada sülh və sabitliyin təmin olunmasına töhfə vermək niyyətindədir. Azərbaycanın heç kimin ərazi bütövlüyünə, torpağına və sərvətlərinə iddiası yoxdur. Sadəcə olaraq, 30 il işğala məruz qalmış bir ölkə kimi indi digər xalqların hüquqlarını müdafiə edir və beynəlxalq hüquqa əsaslanan addımlar ataraq müstəmləkəçiliyə qarşı mübarizəyə öz töhfəsini verir”.
K.Novruzovun sözləri görə, əgər Fransa Azərbaycanın onun daxili işlərinə qarışdığını iddia edirsə, o zaman öncə öz Cənubi Qafqaz siyasətinə nəzər salmalıdır. Məsələn, 30 il ərzində ATƏT-in Minsk Qrupunun həmsədrlərindən biri kimi Fransanın nümayəndələri nə ilə məşğul olublar? Keçmiş Ermənistan-Azərbaycan Dağlıq Qarabağ münaqişəsinin həllinə hansı töhfəni veriblər? İkinci Qarabağ müharibəsi zamanı hansı mövqeyi tutublar? Cənubi Qafqazda sülhün təmin olunması üçün hansı addımları atıblar? Azərbaycanın haqlı mübarizəsinə hansı formada dəstək veriblər? Ümumiyyətlə, Fransanın Cənubi Qafqaz və Azərbaycanla bağlı mövqeyi nə zaman ədalətli olub?
Bu suallara cavab verməli olan, ilk növbədə, Fransa Prezidenti Emmanuel Makron və onun xarici siyasətini müəyyən edən şəxslərdir. Düşünürəm ki, hazırkı şəraitdə Fransanın Azərbaycana qarşı ittihamları sadəcə daxili ictimai rəyi yayındırmaq məqsədi daşıyır. Çünki hazırda Bakı və Paris arasındakı münasibətlər kifayət qədər gərgindir”.
Şərhçinin sözlərinə görə, Fransanın Azərbaycana qarşı əsassız ittihamlar irəli sürməsi onun daxili ictimai rəyini manipulyasiya etmək cəhdindən başqa bir şey deyil: “Makron hakimiyyətinə yönələn tənqidləri özündən yayındırmaq üçün Azərbaycanın ünvanına ittihamlar səsləndirir. Lakin beynəlxalq hüquq və ədalət anlayışı mövcuddur. Əgər bu prizmadən baxsaq, bu gün Azərbaycanın beynəlxalq arenadakı rolu və nüfuzu Fransadan daha yüksəkdir. Azərbaycan beynəlxalq hüquqa, sabitliyə və təhlükəsizliyə verdiyi töhfələrlə Fransa ilə müqayisədə daha etibarlı və hörmətə layiq bir dövlət kimi çıxış edir. Bu baxımdan, Fransa xarici düşmən axtarmaq əvəzinə öz daxili problemləri ilə məşğul olmalı və daha ciddi böhranlarla üzləşməmək üçün siyasətinə ciddi düzəlişlər etməlidir”.
Fidan Hacızadə
09:06 31.01.2025
Oxunuş sayı: 2681
