“Azərişıq” ASC-nin nümayəndələri Qubada sahibkarlarla görüşüblər
“Azərişıq” ASC Quba Rayonu Heydər Əliyev Mərkəzində sahibkarlarla görüş keçirib.
Crossmedia.az ASC-yə istinadən xəbər verir ki, görüşdə 30-dan çox sahibkar və yerli sakin iştirak edib.
Tədbirdə “Azərişıq” ASC-nin “ASAN Xidmət”lə İş Departamentinin direktor müavini İnam Yusifov, Xaçmaz RETSİ-nin (Regional Enerji Satışı və Təchizatı İdarəsi) rəisi Vüqar Kazımov, “Azərişıq” ASC-nin Aktların Uçotu və İcrasına Nəzarət şobəsinin rəisi Fuad Yusifov, Quba Rayon İcra Hakimiyyətinin Sosial-İqtisadi İnkişafın Təhlili və Proqnozlaşdırılması şöbəsinin müdir müavini Loğman Əliyev iştirak ediblər.
Görüş zamanı sahibkar və vətəndaşlara “Azərişıq” ASC-nin regionlarda həyata keçirdiyi yenidənqurma və əsaslı təmir işləri barədə geniş məlumat verilib. Eyni zamanda yeni elektrik təchizatı şəbəkəsinə qoşulma prosesi, texniki şərtlərin verilməsi və ödəniş qaydaları izah olunub. Vətəndaşların daha çox müraciət etdikləri digər xidmətlər – abonentin balansındakı avadanlıqlara texniki xidmət göstərilməsi, çoxmənzilli binalarda yaşayış mənzillərinin qeydiyyatı, sayğac zədələnməsi hallarında görüləcək tədbirlər, qeyri-əhali abonentlərinin ad dəyişikliyi proseduraları, smart kartın və qüsurlu ödənişlərin bərpası xidmətləri barədə ətraflı məlumatlar verilib, onların sualları cavablandırılıb.
Eyni zamanda, həm “ASAN Xidmət” mərkəzlərində, həm də elektron platformalar üzərindən təqdim edilən bütün xidmətlər barədə ətraflı məlumat paylaşılıb. Vətəndaşların və sahibkarların müraciətlərinin daha asan və sürətli həlli üçün yaradılan imkanlar vurğulanıb. Abonentlərin onlayn qaydada quruma müraciət etmə imkanları ətraflı izah olunub. Fermerlərin və yerli sakinlərin müxtəlif məsələlərlə bağlı sualları dinlənilib, qaldırılan bəzi problemlər yerindəcə həll edilib.
Qeyd edək ki, “Azərişıq” ASC nümayəndələri sahibkar və vətəndaşlarla görüşləri ölkənin bütün regionlarında davam etdirirlər.
11:55 18.01.2025
Oxunuş sayı: 9147
