Durham Universitetində COP29-la bağlı tədbir keçirilib
Böyük Britaniyanın tanınmış ali təhsil ocaqlarından biri olan Durham Universitetinin Hüquq fakültəsində “COP29-dan çıxarılan nəticələr: Azərbaycanın daha yaşıl dünyaya töhfələri” mövzusunda tədbir keçirilib.
Crossmedia.az xəbər verir ki, tədbirdə Böyük Britaniyadakı səfirimiz Elin Süleymanov Azərbaycanın COP29-a ev sahibliyi etməsi zamanı əldə olunan tarixi razılaşmalardan danışıb. Qeyd edib ki, Bakıda qəbul olunan qərarlarla möhkəm və şəffaf karbon bazarlarının yaradılması, eləcə də İtki və Zərər Fondunun tam fəaliyyətə başlaması kimi mühüm irəliləyişlərə nail olunub. Bu qərarlar iqlim dəyişikliyinə qarşı mübarizədə mühüm addımlar hesab edilir. Elin Süleymanov bildirib ki, COP-u regiona məhz Azərbaycan gətirib. Qısa hazırlıq müddətinə baxmayaraq, Azərbaycanın COP komandası konfransın logistikasını və digər təşkilati məsələləri peşəkarlıqla həyata keçirərək yüksək nümunə göstərib.
Səfir, həmçinin Azərbaycanın yaşıl enerji sahəsində, xüsusilə işğaldan azad olunmuş ərazilərdə həyata keçirdiyi xalis sıfır layihələrindən bəhs edib. Qeyd edib ki, bu layihələr Azərbaycanın daha davamlı və ekoloji gələcəyə verdiyi töhfələrin bir hissəsidir.
Tədbir Durham Universitetinin Hüquq fakültəsinin tələbəsi Riyad Babayevin təşkilatçılığı ilə baş tutub.
15:50 17.01.2025
Oxunuş sayı: 27089
