Trampın “Cəhənnəm alovu” hədəsi: İsrail və HƏMAS razılığa gələcəkmi? - ŞƏRH
ABŞ Prezidenti Cozef Bayden və yeni seçilmiş prezident, Respublikaçıların lideri Donald Trampın nümayəndələrinin iştirakı ilə keçirilən danışıqlarda irəliləyiş əldə edilib. İsrail və HƏMAS arasında atəşkəsə dair razılaşma layihəsi təqdim olunub.
Danışıqlar çərçivəsində hər iki tərəf girovların və məhbusların azad edilməsi müqabilində döyüşlərin dayandırılması barədə razılığa gəlib. Lakin HƏMAS bu razılaşmanın müharibənin tamamilə sona çatması və İsrailin Qəzzadan çıxması ilə nəticələnməli olduğunu vurğulayıb. İsrail isə HƏMAS tamamilə ləğv olunmadan müharibəni dayandırmaq niyyətində deyil. Tramp girovlar azad edilməzsə, ciddi nəticələrin olacağını bildirib. Bayden isə vəzifədən ayrılmadan razılaşma əldə etmək üçün bütün səylərini göstərir. Bu, o deməkdir ki, Yaxın Şərqdə vəziyyət gərgin olaraq qalır.
Mövzu ilə bağlı politoloq Əlimusa İbrahimov Crossmedia.az-a açıqlama verib:
“İsraillə HƏMAS arasında razılığa gəlinməsi, həmçinin girovların və həbsdə olanların azad olunacaqları barədə verilən məlumatların dəfələrlə şahidi olmuşuq. Amma hər dəfə son anda bu və ya digər səbəblərdən, yaxud tərəflərt amamilə zidd mövqedə olduqlarına görə razılaşmalar müsbət sonlanmayıb. Sonuncu razılığın da hansısa nəticəyə gətirib çıxaracağına inananların sayı çox deyil. Çünki tərəflərin mövqeyində tamamilə bir-birindən uzaqlaşan məsələlər var. Buna baxmayaraq, Trampın andiçmə mərasiminə qədər müəyyən irəliləyişin olacağına inananlar da az deyil. Onlar bu məsələdə Respublikaçıların liderinin daha ciddi olduğunu əsas gətirərək sözügedən fikri irəli sürürlər”.
Politoloq Trampın girovlar azad edilmədikcə ciddi nəticələrin olacağına dair bəyanatını xatırladıb: “Bayden vəzifəsindən ayrılmadan razılıq əldə etmək üçün bütün səylərini göstərir. ABŞ-nin yeni seçilmiş prezidenti yanvarın 20-nə qədər razılıq əldə olunmasa, HƏMAS-a qarşı “cəhənnəm alovu” baş verəcəyini vəd edib. Bayden administrasiyasından fərqli olaraq bu məsələdə Tramp İsrail dövlətinin mənafeyi baxımından çıxış etməsi diqqətdən yayınmamalıdır. Bayden mütəmadi olaraq İsrail Baş naziri Benyamin Netanyahunu tələb olunandan daha artıq gücdən istifadə etməkdə günahlandırır, silah təchizatını kəsməklə hədələyirdi. Buna baxmayaraq o, Netanyahunun HƏMAS-la bağlı güzəştə getməyə məcbur edə bilmədi. Trampın yenidən seçilməsi ilə vəziyyət tamamilə dəyişir və Netanyahu hökuməti yeni administrasiyadan HƏMAS və fələstinlilərə qarşı hüdudsuz səlahiyyətlər alır. Bu, Netanyahunun istədiyini edəcəyini anlamına gəlirmi? Demək çətindir”.
Politoloq İsrail və HƏMAS arasında atəşkəsin mümkünlüyünə ümid etdiyini də vurğulayıb:
“Digər tərəfdən, Trampın HƏMAS-ı “cəhənnəm alovu” ilə hədələməsi cəhənnəmin elə ortasında yaşayanlara təsir göstərəcəkmi? Bütün bunların cavabı 20 yanvardan sonra bilinəcək. İndilikdə bizim İsraillə-HƏMAS arasında atəşkəsin əldə olunmasına ümid etməkdən başqa edə biləcəyimiz bir şey yoxdur”.
Maral Şahverdili
08:52 15.01.2025
Oxunuş sayı: 21525
