“Azərbaycan və BƏƏ arasında münasibətlər xüsusi strateji əhəmiyyətə malikdir”
Azərbaycan Respublikasının Prezidenti İlham Əliyev ilə Birləşmiş Ərəb Əmirliklərinin Prezidenti Şeyx Məhəmməd bin Zayed Al Nəhyan arasında mühüm görüş baş tutub. Tərəflər, ikitərəfli dostluq və qardaşlıq əlaqələrini yüksək qiymətləndirərək, siyasi və iqtisadi münasibətlərin mükəmməl səviyyədə olduğunu vurğulayıblar. Prezident İlham Əliyev Azərbaycanın COP29-a verdiyi töhfələrin və bu çərçivədə BƏƏ ilə əməkdaşlığın əhəmiyyətini xüsusi qeyd edib. Görüş zamanı ikitərəfli, regional və qlobal məsələlər ətrafında fikir mübadiləsi aparılıb.
Mövzu ilə bağlı Milli Məclisin deputatı Tural Gəncəliyev Crossmedia.az-a açıqlamasında bildirib ki, Azərbaycan Respublikasının Prezidenti İlham Əliyevin, Birləşmiş Ərəb Əmirliklərinin şeyxinin dəvəti ilə bu ölkəyə işgüzar səfəri böyük strateji əhəmiyyətə malikdir. Deputat qeyd edib ki, Azərbaycana hörmət və ehtiram, müsəlman dünyasında, ərəb ölkələri arasında kifayət qədər güclüdür:
"Biz İslam Əməkdaşlıq Təşkilatı çərçivəsində, eləcə də Ərəb Dövlətləri Liqasında çox önəmli bir oyunçu kimi qəbul olunuruq. Bunun əsas səbəbi cənab Prezidentin güclü lider kimi həyata keçirdiyi siyasətdir. Azərbaycanın sərhədlərindən kənarda qlobal gündəliyin müəyyənləşdirilməsində rolun artması bunun bariz nümunəsidir".
Tural Gəncəliyev vurğulayıb ki, Azərbaycan 2011-ci ildə BMT Təhlükəsizlik Şurasının qeyri-daimi üzvü seçildiyi vaxtdan İslam dünyası, Türk dünyası və İslam Əməkdaşlıq Təşkilatında lider mövqeyini gücləndirib. Daha sonra beynəlxalq səviyyədə mühüm tədbirlər keçirmək və siyasətdə əhəmiyyətli rol oynamaqla Prezident İlham Əliyev liderlik qabiliyyətini bir daha sübut edib.
Deputatın fikrincə, Birləşmiş Ərəb Əmirlikləri ilə Azərbaycan arasındakı münasibətlər xüsusi strateji əhəmiyyətə malikdir. Deputat qeyd edib ki, Körfəz regionunun mühüm oyunçusu olan BƏƏ ilə əlaqələr Azərbaycanın Fars Körfəzində təsirini artırır:
"Dünya enerji resurslarının Avropa və dünya bazarlarına çıxışı Fars Körfəzi, Oman Körfəzi, Ərəbistan dənizi və Hind okeanı vasitəsilə həyata keçirilir ki, burada da BƏƏ-nin rolu böyükdür. Bu, Azərbaycanın bu regionlarda mühüm oyunçu olduğunu göstərir".
Bundan başqa, alternativ enerji sahəsində əməkdaşlıq məsələsinə də diqqət çəkən deputat vurğulayıb ki, Azərbaycan və BƏƏ bu sahədə birgə fəaliyyət göstərərək yeni texnologiyaların tətbiqi və nou-haunun inkişafı sahəsində əməkdaşlıq edirlər.
Tural Gəncəliyev əlavə edib ki, Azərbaycan artıq Avropa İttifaqı ilə strateji əməkdaşlıq sazişləri imzalamış, Türk dünyasında və Mərkəzi Asiyada Çinlə Avropa arasında tranzit kommunikasiya xətlərinin əsas oyunçusu kimi mövqeyini təsdiqləyib. Deputat bildirib:
"Azərbaycan təkcə neft-qaz ölkəsi deyil, həm də strateji planlama və güclü siyasi-hərbi oyunçu kimi dünya siyasətində öz yerini möhkəmləndirmişdir. Azərbaycanın coğrafi mövqeyi, siyasi sabitliyi və güclü liderliyi, ölkəmizi beynəlxalq səhnədə güclü tərəfdaş kimi qəbul etdirir. Bölgədəki siyasi sabitlik və Rusiyanın Ukrayna müharibəsi fonunda yaranmış çətinliklər nəticəsində Azərbaycan tək sabitlik adası kimi görünür. Bu səbəbdən Körfəz ölkələri və ərəb dünyası Azərbaycanı İslam Əməkdaşlıq Təşkilatı çərçivəsində mühüm oyunçu kimi qəbul edir".
Deputat yekunda bildirib ki, cənab Prezidentin Birləşmiş Ərəb Əmirliklərinə səfəri Azərbaycanın qlobal və regional siyasətdə artan rolunun növbəti sübutudur. Azərbaycanın yeni nəqliyyat və enerji xəritəsi yaratması, həmçinin güclü liderliyi, ölkəmizi yeni dünya nizamında qlobal oyunçuya çevirib.
Nihat Tahirov
05:04 15.01.2025
Oxunuş sayı: 7902
