Sabitliyin görünməz qəhrəmanları: Azərbaycanın Təhlükəsizlik Qalası
Dünyada müharibələr, terror, iğtişaş, gərginliklər davam etsə də, Azərbaycanda vəziyyət stabildir. Əlbəttə ki, Azərbaycanda da sabitliyi pozmaq istiyənlər var, lakin onların qarşısını Azərbaycanın hüquq mühafizə və xüsusi xidmət orqanları, Dövlət Təhlükəsizlik Xidməti, Daxili İşlər Nazirliyi (DİN), aidiyyəti güc strukturlarının çevik və peşəkar əməkdaşları alır. Son günlər, xüsusilə də dünən DTX əməkdaşlarının keçirdikləri əməliyyatlar nəticəsində ölkəmizdəki sabitliyi pozmaq, terror aktı həyata keçirmək istəyən şəxslərin zərərsizləşdirilməsi faktı ancaq qürur və fəxarət doğura bilər.
Məsələ ilə bağlı Milli Məclisin Müdafiə, təhlükəsizlik və korrupsiya ilə mübarizə komitəsinin sədri Arzu Nağıyev Crossmedia.az-a açıqlama verib. Millət vəkili açıqlamada bildirib:
“Son vaxtlar xüsusi xidmət orqanlarının keçirdiyi əməliyyatlar bir daha göstərdi ki, düşmən öz məkrli siyasətindən əl çəkmir. Müxtəlif radikal dini qurumlar və düşmən xüsusi xidmət orqanları birgə Azərbaycan ərazisində müxtəlif təxribatlar, qəsdən adam öldürmə, eyni zamanda terror aktları törətməkdə israrlıdırlar. Bunun da qarşısı mütəmadi olaraq alınır. Hüquq-mühafizə orqanları, eyni zamanda xüsusi xidmət orqanları birmənalı şəkildə Azərbaycan ərazisində əməliyyat şəraitinə nəzarət edir və koordinasiyalı şəkildə öz əməliyyatlarını həyata keçirirlər.
Sonuncu hadisə bir daha göstərdi ki, üçüncü ölkə ərazisində olan azərbaycanlıdan və ya digər dövlətin vətəndaşından istifadə edərək Azərbaycanda dini icmanın üzvlərindən birinə qarşı terror hadisəsini həyata keçirməyi planlaşdırırlar və bunun qarşısı çox peşəkarlıqla alınıb. Əsas məqam ondan ibarətdir ki, xüsusi xidmət orqanlarının rəhbərliyi də peşəkarlardan ibarət olduqda lazımi addım atılır və təxribatların qarşısı peşəkarlıqla alınır. Təbii ki, Ali Baş Komandan İlham Əliyevin xüsusi xidmət orqanlarına etimadı bir daha özünü göstərir və istər 44 günlük müharibədə, istər ondan sonra, istərsə də digər istiqamətlərdə xüsusi xidmət orqanları ən yüksək səviyyədə öz peşələrinin öhdəsindən gəlirlər.
Dünən Dövlət Təhlükəsizlik Xidmətinin keçirdiyi əməliyyat da buna bir nümunədir. Son vaxtlar radikal dini qruplara qarşı mübarizə daha da genişləndirilib. Müxtəlif dövlətlərin xarici xüsusi xidmət orqanlarının təxribatlarının qarşısı alınır və əməliyyat şəraitinə tam nəzarət edilir. Bu, peşəkarlıqdır, zəhmət tələb edən işdir və bunun da bəhrələri göz qabağındadır”.
Nərgiz Camalzadə
04:46 15.01.2025
Oxunuş sayı: 12442
