Ermənistanın Azərbaycan dövlətinə vurduğu yüz milyardlarla zərər ödənilməlidir
Ermənistan Baş naziri Nikol Paşinyan regionda uzunmüddətli sülhün təmin olunması məqsədilə bir sıra təkliflər irəli sürüb. Bu təkliflər dialoq və əməkdaşlıqdan tutmuş sərhəd problemlərinin həllinə, itkin düşmüş şəxslərin taleyinin aydınlaşdırılmasından atəşkəs rejiminin effektiv nəzarət mexanizmlərinin yaradılmasına qədər müxtəlif məsələləri əhatə edir. Lakin təqdim olunan təkliflər hər iki tərəf üçün vacib olan həssas məqamların mövcudluğunu da ortaya qoyur.
Məsələ ilə bağlı Crossmedia.az-a danışan politoloq Əli Mustafa bildirib ki, regionda sülhün təmin edilməsi hər kəs üçün faydalıdır, lakin Ermənistan tərəfindən təqdim edilən təkliflər bir sıra aydınlaşdırılmalı məqamlar ehtiva edir.
“Ermənistan otuz il ərzində Azərbaycan torpaqlarını işğal edib, talanlar törədib, insanları qovub və soyqırım həyata keçirib. Bu tarix unudulmamalıdır. Bu gün isə heç nə olmamış kimi davranaraq bərabərhüquqlu münasibətlərin qurulmasını tələb edirlər. Bu, psixoloji baxımdan da problemlər yaradır”. – deyə politoloq vurğulayıb.
Əli Mustafanın fikrincə, Ermənistanın delimitasiya və demarkasiya məsələsinə yanaşması da diqqətlə araşdırılmalıdır:
“Keçmişdə sovet dövründə Azərbaycan torpaqlarının haqsız şəkildə Ermənistana verilməsinin məsələsi dəqiqləşdirilməlidir. Bundan başqa, beynəlxalq məhkəmələrdə qarşılıqlı iddialardan imtina tələb olunur, amma Ermənistanın Azərbaycan xalqına və dövlətinə vurduğu yüz milyardlarla zərərin taleyi necə olacaq? Bu zərərlər ödənilməlidir”.
Politoloq əlavə edib ki, Ermənistan hələ də öz öhdəliklərini yerinə yetirməyib:
“Ermənistan bizə vurduğu maddi və mənəvi zərərləri ödəməyib. Əvvəlcə bu məsələ həll olunmalı, daha sonra sülh danışıqları davam etdirilməlidir. Azərbaycanın ərazi bütövlüyü məsələsi əsas prinsip olmalıdır. Ermənistan bu zərərləri ödəmədən sülh təşəbbüsləri ilə çıxış etməsi inandırıcı deyil”.
Sonda politoloq Ermənistanın faşist siyasətinə diqqət çəkib:
“Ermənistan faşizm ideologiyasına əsaslanan cinayətlərə görə beynəlxalq mühakimə olunmalıdır. Bu məsələlər aydınlaşdırılmadıqca sülhə nail olmaq çətin olacaq”.
Əli Mustafanın sözlərinə görə, sülh müqaviləsinin imzalanması üçün bütün bu məsələlər dərindən araşdırılmalı və Ermənistanın məsuliyyətli yanaşması təmin edilməlidir.
Maral Şahverdili
08:08 11.01.2025
Oxunuş sayı: 13676
