Orta Şərqdə siyasi “zəlzələ”: İsrail Türkiyə qarşısında zəifdir
Türkiyə ilə İsrail arasında münasibətlər getdikcə gərginləşir. Rəsmi Ankaranın Yaxın Şərqdə mövqelərini gücləndirməsi Təl-Əvivi narahat etməmiş deyil. Bir çox ekspertin fikrincə, İrail bunu özünə təhdid kimi qiymətləndirə bilər.
Bu gün Yaxın Şərqdə vəziyyət onsuz da kifayət qədər gərgindir. İsrail Fələstinin HƏMAS və Hizbullah qruplaşmaları ilə müharibəni davam etdirir. Türkiyənin savaşa son qoymaq cəhdləri isə hələlik nəticə vermir.
Proseslərin gələcək inkişafı ilə bağlı Crossmedia.az-a danışan siyasi şərhçi Zeynal Əmrəliyevin fikrincə, Türkiyə və İsrail arasında Orta Şərqdə ciddi mübarizə gedir: “Uzun müddətdir ki, bu mübarizə mərhələli şəkildə davam edir. Lakin hakimiyyət dəyişikliyi fonunda bu mübarizə daha kəskin xarakter alır və İsrail artıq Türkiyəyə qarşı koalisiyaların qarşısını almaq üçün addımlar atır. Bu, çox asan məsələ deyil. Çünki Türkiyənin hazırkı Prezidenti Rəcəb Tayyib Ərdoğan ərəb dünyasında liderdir və çox böyük nüfuza malikdir”.
Z. Əmrəliyev həmçinin vurğulayıb ki, Ərəb dünyasında əsas üstünlük qazanan dövlətlər, xüsusilə Qətər, Türkiyə ilə müttəfiqdirlər: “Əksinə, İsrail Prezidenti Benyamin Netanyahunun işğal siyasəti ərəb dünyasında bu dövlətə qarşı güclü etiraz dalğasının yaranmasına səbəb olub. Bu etiraz dalğasına Türkiyənin rəhbərlik etməsini istəyən çoxlu insan var. Hazırda İsrail Türkiyə qarşısında zəif vəziyyətdədir və ittifaq bağlayacağı güc yalnız PKK və bu terror təşkilatının uzantıları olan YPG və PYD ola bilər”.
Samirə Şərif
12:24 09.01.2025
Oxunuş sayı: 17596
