Azərbaycanla ABŞ və Aİ arasında münasibətlər düzələ bilər - Politoloq
Azərbaycan Prezidenti İlham Əliyev yanvarın 7-də yerli televiziya kanallarına verdiyi müsahibədə ölkənin daxili və xarici siyasəti, perspektiv hədəfləri və nəaliyyətləri barədə danışdı. Dövlət başçısının müahibəsində toxunduğu əsas məsələlərdən biri də ABŞ-Azərbaycan münasibətlərinin perspektivi ilə bağlıdır. Belə ki, ölkə lideri ABŞ-nin yeni seçilmiş Prezidenti Donald Trampın Vaşinqton-Bakı əlaqələrini strateji səviyyəyə qaldıracağını bildirib. Dövlət başçısı, həmçinin Azərbaycanla Avropa İttifaqı (Aİ) arasındakı ikitərəfli münasibətlərin perspektivindən də söz açıb.
Dövlət başçısının səsləndirdiyi fikirlər barədə Crossmedia.az-a danışan politoloq Natiq Miri qeyd edib ki, Azərbaycan və Aİ arasındakı münasibətlər xüsusilə Fransa prezidenti Makronun rolu ilə gərgin bir vəziyyətə düşüb. Makron yalnız Azərbaycan ilə Aİ münasibətlərinə zərər vermir, həm də özü Avropa İttifaqı üçün ən böyük problemə çevrilib. Təəssüf ki, bəzi Avropa strukturları Makronun siyasətinin girovuna çevrilib və bəzən Aİ-nin geosiyasi maraqlarına uyğun olmayan qərarlar qəbul edilir. Avropa Parlamentində, Avropa Şurasında, Avropa Şurası Parlament Assambleyasında və son dövrlərdə Avropa Komissiyası səviyyəsində Aİ-nin Azərbaycana əleyhinə davranışları müşahidə olunur”.
Ekspertin sözlərinə görə, mövcud gərginliyin səbəbkarı Azərbaycan yox, Aİ-dir: “Aİ Makronun uğursuz siyasətinin girovununa çevrilib. Təşkilat bunu başa düşməli və etiraf etməlidir”.
Politoloq qeyd edib ki, Azərbaycanın və qardaş Türkiyənin mövqeləri həm regional, həm də qlobal səviyyədə gücləndikcə, Aİ-nin rəsm Bakıya ehtiyacı daha da artacaq: “Çünki Ermənistanla, yəni Cənubi Qafqazın ən zəif ölkəsi ilə əməkdaşlıq nə Makronun siyasətinə, nə də Avropa İttifaqının Cənubi Qafqaz siyasətinə uğur gətirəcək. Prezident İlham Əliyevin də dediyi kimi, bu regionun güc mərkəzi Azərbaycandır. Paralel olaraq, qardaş Türkiyə artıq bu regiondadır. Buna görə də Azərbaycanla razılaşmayan, Azərbaycanla normal münasibətlər qurmaq istəməyən və Azərbaycanın maraqlarını görməyən heç bir güc mərkəzi Cənubi Qafqazda, ümumiyyətlə Avrasiyada ciddi siyasi uğur əldə edə bilməz”.
N.Mirinin fikrincə, hər kəs mövcud reallığı başa düşəndə münasibətlər tənzimlənəcək: “Çünki Azərbaycan münasibətlərini inkişaf etdirməyə hazırdır və heç bir qapını bağlamır. Buna görə də Aİ Makronun siyasətinin girovluğundan azad olunandan rəsmi Bakı ilə təşkilat arasında problemlər də avtomatik həllini tapacaq. Yəni bu münasibətləri müsbət şəkildə zirvəyə qaldırmaq mümkün olacaq. Perspektiv bunu göstərir. Unutmaq olmaz ki, hazırda Fransada ciddi siyasi böhran yaşanır. Onun hakimiyyət dövrü bitəcək. Hazırkı vəziyyətin dəyişməsi üçün yeni simalar ortaya çıxacaq və onlar həm regional, həm də qlobal səviyyədə geosiyasi vəziyyəti düzgün qiymətləndirib, Azərbaycanın bu prosesdəki yerinə uyğun hərəkət edəcəklər. Bu, əlbəttə, Azərbaycanın öz mövqeyinə hörmətlə yanaşılmasını tələb edir və qarşılıqlı hörmət prinsipi əsasında qurulmalıdır”.
Fidan Hacızadə
14:20 08.01.2025
Oxunuş sayı: 15824
