Prezident İlham Əliyevin liderlik nümunəsi: təyyarə qəzasına qətiyyətli və prinsipial yanaşma
2024-cü ilin dekabrında baş vermiş faciəvi təyyarə qəzası Azərbaycan xalqı üçün ağır sınaq oldu. Belə bir həssas məqamda Prezident İlham Əliyevin hadisəyə dərhal reaksiya verməsi və məsələni şəxsi nəzarətinə götürməsi onun liderlik bacarığını və vətəndaşına verdiyi böyük dəyəri bir daha göstərdi. Dövlət başçısı qəzanın səbəblərinin obyektiv araşdırılması və ədalətli nəticələrin əldə edilməsi üçün hərəkətə keçdi, Dövlət Komissiyası yaratdı və aidiyyəti qurumlara konkret tapşırıqlar verdi. Prezident İlham Əliyevin yüksək həssaslıq sərgiləməsi, Azərbaycan dövlətinin öz vətəndaşının təhlükəsizliyinə və rifahına olan qətiyyətli yanaşmasının bariz nümunəsidir.
Deputat Vüqar Rəhimzadə prezidentin bu məsələdə güclü mövqeyi ilə bağlı fikirlərini Crossmedia.az saytı ilə bölüşüb: “Məlum olduğu kimi, 2024-cü ilin dekabr ayının 25-də Azərbaycan xalqına və dövlətinə böyük faciə üz verdi. Bakı-Qroznı reysini yerinə yetirən “Azərbaycan Hava Yolları” Qapalı Səhmdar Cəmiyyətinə məxsus “Embraer 190” tipli sərnişin təyyarəsi qəzaya uğradı. Hadisənin səbəblərinin tam şəkildə və obyektiv araşdırılması hazırda Prezident İlham Əliyevin nəzarəti altındadır. Həmin gün Sankt-Peterburqda MDB üzv ölkələri dövlət başçılarının qeyri-rəsmi Zirvə görüşündə iştirak etmək üçün Rusiya Federasiyasına səfərə yola düşən Prezident İlham Əliyevə Rusiya hava məkanında olarkən baş vermiş təyyarə qəzası haqqında məruzə edildi və dövlətimizin başçısı dərhal geri dönmək barədə tapşırıq verdi. Hələ Bakıya qayıdarkən cənab Prezidentin göstərişi ilə Dövlət Komissiyası yaradıldı və müvafiq qurumların nümayəndələrindən ibarət heyət dərhal Aktau şəhərinə ezam edildi. Bütün bunlar bir daha Prezident İlham Əliyevin öz xalqının və ölkəsinin maraqlarını hər şeydən üstün tutduğunu göstərir. Təyyarə yerə endikdən dərhal sonra hadisə ilə bağlı Heydər Əliyev Beynəlxalq Aeroportunda müşavirə keçirən Prezident İlham Əliyev bildirdi ki, məsələ tam araşdırılmalıdır”.
Deputat, prezident İlham Əliyevin ekipaj üzvlərini təltif etməsindən danışıb: “Prezident İlham Əliyev dekabrın 29-da vida mərasimində iştirak etdi, həlak olan ekipaj üzvlərinin yaxınlarına başsağlığı verdi. Həmin gün dövlət başçısının müvafiq Sərəncamı ilə Qazaxıstanda Azərbaycana məxsus sərnişin təyyarəsinin qəzaya uğraması zamanı xidməti vəzifələrinin yerinə yetirilməsində, sərnişinlərin həyatının xilas edilməsində yüksək peşəkarlıq, şücaət və fədakarlıq göstərən ekipaj üzvlərinin təltif edilməsi onların cəsarətini yüksək qiymətləndirmək baxımından mühüm əhəmiyyət kəsb edir. Bu təltiflər cəmiyyətə milli dəyərlərin, Vətənə xidmətin və fədakarlığın əhəmiyyətini nümayiş etdirərək gələcək nəsillər üçün nümunə rolunu oynayır. Prezident İlham Əliyevin yanvarın 6-da ekipaj heyətinin ailə üzvləri və qəza zamanı sağ qalan təyyarə bələdçiləri ilə görüşü bir daha təsdiqlədi ki, dövlətimizin başçısı hər zaman öz vətəndaşının yanındadır. Həmin görüşdə dövlət başçısının “Mən həlak olanların ailə üzvlərini, eləcə də ekipaj üzvlərini bu yüksək mükafatları şəxsən sizə təqdim etmək, sizə bir daha başsağlığı vermək və Azərbaycan dövlətinin hər zaman sizinlə olacağını bəyan etmək üçün dəvət etdim. Mən sizə müraciət və xahiş etmək istəyirəm ki, həyatın istənilən şəraitində sizin arxanızda güclü Azərbaycan dövlətinin dayandığını biləsiniz” sözləri cənab İlham Əliyevin hər zaman xalqının yanında olan Lider olmasının, vətəndaşına verdiyi dəyərin bariz nümunəsidir.
Azərbaycan dövlətinin təyyarə qəzası ilə bağlı mövqeyi qətiyyətli, prinsipial və ədalətlidir. Məsələ tam araşdırılmalı, günahkarlar cəzalandırılmalıdır”.
Ayhan Ağarzayev
14:06 08.01.2025
Oxunuş sayı: 16784
