"Qərb ölkələrinin Azərbaycana qarşı məkrli siyasətinin kökündə ölkəmizin inkişafı dayanır"
Prezident İlham Əliyevin yanvarın 7-də yerli televiziya kanallarına verdiyi müsahibə bir daha Azərbaycanın son illərdə qazandığı böyük nailiyyətləri və beynəlxalq arenadakı gücünü nümayiş etdirdi. Müsahibədə dövlətimizin başçısı, ölkəmizin sürətli inkişafı, Qarabağın işğaldan azad edilməsindən sonra həyata keçirilən bərpa və quruculuq işləri, habelə Azərbaycanın beynəlxalq nüfuzunun getdikcə artmasından geniş şəkildə bəhs etdi.
Prezident İlham Əliyevin dolğun və əhatəli müsahibəsi, yalnız Azərbaycanın keçdiyi uğurlu yoldan danışmaqla kifayətlənmədi, eyni zamanda, dünya siyasətində baş verən proseslərə, bəzi beynəlxalq güclərin qərəzli yanaşmalarına dair obyektiv fikirləri ilə də diqqət çəkdi. Xüsusilə son illərdə Azərbaycanın regionda və dünyada güc mərkəzinə çevrildiyini vurğulayan Prezident, Qarabağın işğaldan azad edilməsindən sonra əldə edilən nailiyyətlərin əhəmiyyətini bir daha qeyd etdi.
Politoloq Əliqismət Bədəlov Prezident İlham Əliyevin müsahibəsi ilə bağlı fikirlərini Crossmedia.az saytı ilə bölüşüb: "Son illərin hadisələri bir daha təsdiq edir ki, Azərbaycan nəinki regionda, hətta dünyada və beynəlxalq aləmdə güclü bir dövlətə çevrilib. Dünya birliyi bu gücü, bu qüdrəti dörd il əvvəl, Azərbaycan Ordusunun Prezident İlham Əliyevin rəhbərliyi ilə torpaqlarımızı işğaldan azad etdiyi zaman gördü. 30 il ərzində beynəlxalq təşkilatların həll edə bilmədikləri münaqişəni cənab Prezident İlham Əliyevin komandanlığı ilə Azərbaycan cəmi 44 günə həll etdi. Bu, Azərbaycanın öz ərazilərini qorumaq və işğal altında olan torpaqlarını heç bir xarici qüvvənin müdaxiləsi olmadan azad etmək gücündə olduğunu bir daha sübut etdi.
Müharibədən sonra işğaldan azad edilmiş ərazilərdə sürətlə başlayan yenidənqurma işləri bu gün dünyanın diqqət mərkəzindədir. Bütün bunlar Prezident İlham Əliyevin yerli televiziya kanallarına verdiyi müsahibədə də əksini tapıb. Ümumiyyətlə, son illərdə cənab Prezidentin beynəlxalq tədbirlərdə, yüksək səviyyəli görüşlərdə etdiyi çıxışlar və televiziya kanallarına verdiyi müsahibələr dünya ictimaiyyətinin diqqətini çəkir. Prezident İlham Əliyev bu çıxışlarında Azərbaycanın son illərdə sürətli inkişaf yoluna qədəm qoyduğunu, beynəlxalq aləmdə mövqeyinin möhkəmləndiyini və güclü orduya malik olduğunu geniş şəkildə vurğulayıb".
Politoloq, prezident İlham Əliyevin Qarabağ siyasətindən danışıb: "Yola saldığımız 2024-cü ilin yekunlarına nəzər saldıqda, Azərbaycanın beynəlxalq arenada nüfuzunu daha da artıraraq gücünü bir daha sübut etdiyi açıq görünür. Ötən il ərzində Azərbaycan ərazi bütövlüyünü bərpa etdikdən sonra ilk dəfə Prezident və Parlament seçkiləri keçirdi. 2024-cü ildə keçirilən növbədənkənar seçkilər ölkəmizin bütün ərazilərini əhatə etdi və bir daha sübut etdi ki, Qarabağ Azərbaycandır. Bundan əlavə, Azərbaycan ötən il işğaldan azad edilən daha dörd kəndini də ərazilərinə qaytardı.
Bu nailiyyətlərdən biri də “Böyük Qayıdış” planının həyata keçirilməsidir. Öz dədə-baba torpaqlarından didərgin düşmüş soydaşlarımız artıq doğma yurdlarına qayıdır. Bu nailiyyətlər Azərbaycanın uğurlu siyasətinin və xalq-dövlət birliyinin nəticəsidir. Prezident İlham Əliyev müsahibəsində də qeyd etdi ki, Azərbaycan bu gün dünyanın güc mərkəzlərindən birinə çevrilib.
Son 17 ildə – 2003-2020-ci illər ərzində Azərbaycan tamamilə fərqli bir reallıqda yaşayırdı. Torpaqlarımız işğal altında idi, Ermənistan öz havadarlarının dəstəyi ilə Azərbaycanı blokadaya almışdı. Lakin Prezident İlham Əliyevin uzaqgörən və düşünülmüş siyasəti sayəsində bu çətinliklərin hamısı aradan qaldırıldı".
Əliqismət Bədəlov Qarabağın yenidənqurma və bərpa işlərində Birinci vitse-prezident Mehriban Əliyevanın da rolunu qeyd edib: "Prezident İlham Əliyev Qarabağ işğaldan azad edildikdən sonra – son 4 ildə həmin bölgəyə 100-dən çox səfər etdiyini vurğuladı. Prezidentin hər səfəri yenidənqurma, quruculuq və bərpa işləri ilə yadda qalır. Birinci vitse-prezident Mehriban Əliyevanın səyləri nəticəsində Qarabağın bir çox ərazilərində Azərbaycanın mədəni irsi bərpa olunub. Prezident və Birinci vitse-prezidentin rəhbərliyi altında görülən işlərin miqyası Azərbaycanın inkişafının davamlı olduğunu təsdiqləyir.
Son illər aparılan quruculuq işləri, Azərbaycanın inkişafını qəbul edə bilməyən bəzi xarici dairələrin qərəzli və məkrli siyasətinə səbəb olub".
"Qərb ölkələrinin Azərbaycana qarşı məkrli siyasətinin kökündə Azərbaycanın inkişafı dayanır" - deyən politoloq Əliqismət Bədəlov bildirib:
"Fransa kimi ölkələrin Azərbaycana qarşı açıq qısqanclıq nümayiş etdirməsi bu siyasətin nəticəsidir. Uzun illərdir demokratiya yolunda addımlayan Fransa, artıq bəzi addımları ilə anti-demokratik bir dövlət təəssüratı yaradır. Prezident Makronun fəaliyyəti isə Azərbaycana qarşı yönəlib.
Azərbaycanın əldə etdiyi bu uğurlar xalqımızda böyük qürur hissi yaradır və ölkəmizin beynəlxalq arenadakı mövqeyini daha da möhkəmləndirir".
Ayhan Ağarzayev
13:53 08.01.2025
Oxunuş sayı: 12305
