Bəzi Qərb dövlətləri COP29-u absurd ittihamlarla siyasiləşdirməyə çalışıblar
Prezident İlham Əliyev jurnalistlərə açıqlamasında COP29-un Azərbaycanın uğurlu təşkilatçılıq təcrübəsini və qlobal iqlim dəyişikliyinə qarşı mübarizədə liderliyini bir daha nümayiş etdirdiyini vurğuladı. Dövlət başçısı bildirdi ki, Bakı konfransı ölkəmizin qlobal səviyyədə davamlı inkişaf məqsədlərinə nail olmaq istiqamətində əhəmiyyətli nəticələr əldə etməklə yadda qaldı. Prezident Əliyev əlavə etdi ki, Azərbaycanın “yaşıl enerji” təşəbbüsləri və beynəlxalq arenada fəal mövqeyi ölkəni qlobal ekoloji siyasətdə aparıcı aktorlardan birinə çevirmişdir.
Bu, Azərbaycan paytaxtının ev sahibliyi etdiyi COP29-un ölkəmiz üçün tarixi bir uğur olduğunu bir daha təsdiqlədi. Tədbirdə əldə edilən razılaşmalar iqlim dəyişikliyi ilə mübarizə üçün yeni imkanlar açdı və Azərbaycanın beynəlxalq mövqeyini gücləndirdi.
COP29 Təşkilat Komitəsinin üzvü, Milli Məclisin deputatı Pərvanə Vəliyeva mövzu ilə bağlı Crossmedia.az-a açıqlamasında bildirib: “COP29 ərəfəsində Azərbaycanın uğurlarına kölgə salmağa yönəlmiş böhtan kampaniyaları, əksər hallarda, ölkəmizin beynəlxalq nüfuzunu sarsıtmaq, daxili və xarici siyasətinə dair faktları təhrif etmək məqsədi güdürdü. Belə kampaniyalar Qərb dövlətləri və onların korrupsioner institutları, qeyri-hökumət təşkilatları, eləcə də Qərb mediası tərəfindən beynəlxalq ictimaiyyəti manipulyasiya etmək iddiası ilə çıxış edirdi. Məqsəd dövlət və hökumət başçılarının iştirakının qarşısını almaq, konfransı absurd ittihamlarla siyasiləşdirmək idi.”
Vəliyeva daha sonra əlavə edib: “Qərb ölkələri tərəfindən maliyyələşdirilən lobbiçilər öz ölkələrinin iqlim öhdəliklərini yerinə yetirmirlər. Onlar inkişaf etməkdə olan ölkələrə maliyyə dəstəyi göstərmək əvəzinə, BMT-nin iqlim konfransını siyasiləşdirməyə çalışmışdılar.
Prezident İlham Əliyev müsahibəsində Avropa Komissiyası rəhbəri Ursula von der Leyenin COP29-da iştirakdan imtina etməsinə toxunub. Aİ rəhbərliyinin əvvəlki konfranslarda aktiv iştirakına baxmayaraq, bu dəfə Bakıya gəlməməsi siyasi səbəblərlə əlaqələndirilir.
Bununla belə, COP29 çərçivəsində “İtki və Zərər Fondu”nun tam fəaliyyətə başlaması üçün konsensus əldə olunub. Həmçinin, karbon bazarlarına dair müzakirələr yekunlaşıb və bu bazarlardan maliyyə axınlarının 2050-ci ilə qədər ildə 1 trilyon dollar təşkil edəcəyi gözlənilir.
Azərbaycan ekoloji layihələr və enerji səmərəliliyi istiqamətində təşəbbüslərini davam etdirərək, qlobal iqlim siyasətində lider kimi mövqeyini gücləndirdi. COP29 Azərbaycanın beynəlxalq səviyyədə məsuliyyətli və etibarlı tərəfdaş olduğunu bir daha təsdiqlədi”.
Maral Şahverdili
12:39 08.01.2025
Oxunuş sayı: 11665
