Deputat: Prezidentin mesajları həm Ermənistan rəhbərliyinə, həm də beynəlxalq ictimaiyyətə ciddi xəbərdarlıqdır

Azərbaycan Prezidenti İlham Əliyev yanvarın 7-də yerli televiziya kanallarına müsahibəsidə bir çox mühüm məsələlərə toxunub. Dövlət başçısı, həmçinin Ermənistanın regionda silahlanma yarışının təhlükəli nəticələrini diqqətə çatdırıb. O, qeyd edib ki, Ermənistanın bu siyasəti Cənubi Qafqazda davamlı sülhün təmin edilməsi üçün ciddi təhdidlər yaradır. Bununla yanaşı, Prezident Azərbaycanın Böyük Qayıdış və bərpa-quruculuq işlərinə xüsusi önəm verdiyini vurğulayıb. İlham Əliyev qeyd edib ki, işğaldan azad edilmiş ərazilərin bərpası və məcburi köçkünlərin doğma yurdlarına qaytarılması istiqamətində görülən işlər Azərbaycanın güclü siyasəti və peşəkar yanaşmasının göstəricisidir.

Prezident bildirib ki, Qarabağ və Şərqi Zəngəzur vahid inkişaf məkanına çevrilir və yaşıl enerji layihələri ilə bütün ölkə əhatə olunacaq. Bu, Azərbaycanın dayanıqlı inkişaf strategiyasının bir hissəsidir.

Ölkə liderinin verdiyi mesajları Crossmedia.az-a dəyərləndirən Milli Məclisin deputatı Arzuxan Əlizadə bu ismarışların xüsusi əhəmiyyət daşıdığını diqqətə çatdırdı: 

“Azərbaycan Prezidenti İlham Əliyev dünən yerli televiziya kanallarına verdiyi müsahibəsində yenə də müxtəlif istiqamətlərə ciddi mesajlar ünvanladı. Bu mesajlardan biri də Ermənistan, onun rəhbərliyi və bu ölkənin arxasında dayanan havadarlara ünvanlanmışdı. Məsələ burasındadır ki, havadarları Ermənistanı daim silahlandırır. Bu silahlanma regionda davamlı sülhün qorunması üçün ciddi təhlükə yaradır”. 

Deputat, Prezident İlham Əliyevin Ermənistanın silahlandırılmasının dərhal dayandırılmalı olduğuna xüsusi diqqət çəkib:

“Prezident qətiyyətlə bildirdi ki, həmin silahlar geri göndərilməlidir, Ermənistan silahsızlaşdırılmalıdır. Çünki Ermənistana göndərilən silahlar gələcəkdə həmin ölkənin təxribat xarakterli addımlar atması ehtimalını artırır və bu, regionda davamlı sülhə ciddi təhdiddir. O, həmçinin vurğuladı ki, Ermənistan Azərbaycan ərazilərinə dair hər hansı ərazi iddialarından əl çəkməli, ölkəmizə qarşı yönəlmiş təxribatçı siyasətinə son qoymalıdır. Eyni zamanda, bu ölkə Azərbaycanın tarixi torpaqlarını geri qaytarmaq istiqamətində ciddi addımlar atmalıdır. Prezidentin söylədiyi kimi, Ermənistanın silahlandırılması davam edərsə, Azərbaycan öz müdafiə xərclərini artırmağa məcbur olacaq. Bu isə ölkə daxilində sosial layihələr və Böyük Qayıdış planının daha sürətli icrası üçün nəzərdə tutulan vəsaitlərin hərbi sahəyə yönəldilməsi deməkdir.”

Deputat bildirib ki, Prezident İlham Əliyevin mesajları həm Ermənistan rəhbərliyinə, həm də beynəlxalq ictimaiyyətə ciddi xəbərdarlıqdır:

“Azərbaycan Prezidenti açıq şəkildə bildirdi ki, Ermənistan və onun havadarları Qarabağın artıq Azərbaycanın və rəsmi Bakının bu ərazilərin bərpası və inkişafı istiqamətində işləri sürətlə davam etdirdiyini anlamalıdır. Prezident İlham Əliyevin rəhbərliyi ilə Azərbaycanın Böyük Qayıdış proqramı artıq uğurla həyata keçirilir və minlərlə məcburi köçkün doğma yurdlarına geri qayıdır”.  

Maral Şahverdili