Paşinyanın “Sülh Sazişi” üzərindəki tərəddüdləri - Açıqlama
Ermənistanın Baş naziri Nikol Paşinyanın “Sülh Sazişi” ilə bağlı mövqeyi beynəlxalq və regional siyasi proseslərdən təsirlənir. Ermənistan hazırda mürəkkəb geosiyasi təzyiqlər altında qərar verməyə məcburdur.
Mövzu ilə bağlı politoloq Elçin Xalidbəyli Crossmedia.az-a açıqlama verib. Onun sözlərinə görə: “Paşinyan hakimiyyəti tam dəqiqliklə anlayır ki, sülh sazişi indi Azərbaycandan daha çox Ermənistana lazımdır. Çünki Paşinyan hakimiyyətinin güvəndiyi beynəlxalq siyasi iradə mərkəzləri, Ermənistanın himayədarları çətin vəziyyətdə qalıblar. Xüsusilə də Bayden Administrasiyasının hakimiyyəti itirməsindən sonra ABŞ-da erməni faktoruna o qədər də böyük əhəmiyyət verməyən Donald Trampın yenidən prezident seçilməsi Ermənistanda çox ciddi təlaş yaradıb. Digər tərəfdən, Rusiyanın və İranın Suriyada məğlubiyyəti, Cənubi Qafqaza təsir imkanlarının zəifləməsi həm İranın, həm Rusiyanın yenə də Ermənistan üçün ciddi problemlər yaratmağa başlamasına səbəb olub. Ermənistanda artıq narahat olmağa başlayıblar ki, yaxın aylarda Ermənistan üçün fəlakətli bir situasiya yarana bilər. Ona görə də Ermənistanın baş naziri Nikol Paşinyan sülh sazişi mövzusunu yenidən gündəmə gətirib aktuallaşdırmağa çalışır. Ancaq bununla belə, Ermənistanın yaxın vaxtlarda sənədi imzalaması Paşinyan hakimiyyətindən, yəni rəsmi İrəvandan asılı məsələ deyil".
Politoloq bildirir ki: “Paşinyan hakimiyyəti Tramp Administrasiyasının öz səlahiyyətlərini icra etməyə başladıqdan sonra tutacağı mövqeyə, xüsusilə də ABŞ-ın Cənubi Qafqaz siyasətinin hansı istiqamətlərə yönələcəyini dəqiqləşdirməyə çalışır. Böyük ehtimalla bu məsələ aydınlaşdıqdan, Tramp Administrasiyasının erməni faktoruna yanaşma tərzi müəyyənləşdikdən sonra Paşinyan hakimiyyəti saziş ilə bağlı öz hədəflərini, yəni niyyətlərini aydınlaşdırmağa çalışacaq. Hələlik rəsmi İrəvan tərəddüddədir.”
“Eyni zamanda, burada əngəlləyici faktorlardan biri də Avropa Birliyinin, xüsusilə də Fransanın mövqeyidir. Əgər Fransada Tramp Administrasiyasının hakimiyyətə başlamasından sonra fərqli prioritetlər istiqamətinə yönəliş olarsa, bu halda Ermənistan beynəlxalq himayəsini tamamilə itirmək təhlükəsi ilə üz-üzə qala bilər və sülh sazişinə daha çox yönəlmək məcburiyyətində olacaq. Yəni hazırda Ermənistanın sazişi imzalayıb-imzalamaması rəsmi İrəvandan asılı deyil. Bu, ABŞ-dan, Fransadan və Avropa Birliyindən asılıdır. Əgər bu məkirli üçlük Ermənistanın arxasından çəkilərsə, o zaman Ermənistan sülh sazişini imzalamaq üçün xahiş etməli olacaq. Yox əgər onlardan biri, məsələn, Fransa Ermənistana sənədi imzalamaq icazəsi verməsə və himayədarlığını davam etdirməkdə israrlı olarsa, bu proses nisbətən uzana bilər. Yəni Paşinyan hakimiyyətinin sülh sazişinə imza atması rəsmi İrəvandan çox, Ermənistanın beynəlxalq himayədarlarının mövqeyindən asılıdır,”– deyə Elçin Xalidbəyli qeyd edib.
Fidan Hacızadə
03:57 07.01.2025
Oxunuş sayı: 5753
