AZAL-ın qəzaya uğrayan təyyarəsinin hesabatı 3 ildən gec olmayaraq təqdim ediləcək
Azərbaycan Hava Yollarına (AZAL) məxsus təyyarənin 2024-cü il dekabrın sonunda Qazaxıstanda qəzaya uğraması ilə bağlı araşdırmanın yekun hesabatı 3 ildən gec olmayaraq təsdiqlənəcək.
Crossmedia.az “TASS”a istinadla xəbər verir ki, bu barədə Qazaxıstanın Nəqliyyat Nazirliyi məlumat verib.
“2024-cü il dekabrın 25-də “Azərbaycan Hava Yolları” QSC-yə məxsus “Embraer E190AR” markalı, 4K-AZ65 dövlət nömrə nişanlı təyyarə ilə baş vermiş aviasiya qəzasının təhqiqatı Qazaxıstan Respublikasının İnvestisiya və İnkişaf nazirinin müvafiq əmrinə uyğun olaraq həyata keçirilir. Əmrin 32-ci bəndinə uyğun olaraq, insan tələfatı ilə nəticələnən aviasiya hadisəsinin təhqiqatı, əlavə araşdırma tələb olunmadıqca, 36 aydan çox olmamalıdır”, - deyə məlumatda bildirilib.
Qeyd edək ki, istintaq komissiyasının üzvü, Qazaxıstanın nəqliyyat nazirinin müavini Talqat Lastaev 2024-cü il dekabrın 30-da Kazinform agentliyinə müsahibəsində araşdırmanın ilkin və ya aralıq nəticələri 30 gün ərzində hazır olacağını bildirib.
Nəzrin Salmanova
11:07 04.01.2025
Oxunuş sayı: 28855
