AZAL təyyarəsinin qara qutularının Braziliyada oxunmasına başlanılıb
Braziliyada 25 dekabrda Qazaxıstanın Aktau şəhəri yaxınlığında qəzaya uğrayan AZAL təyyarəsinin kokpitinə aid səs yazan cihazın (qara qutunun) oxunmasına başlanılıb.
Bu barədə Crossmedia.az Braziliyanın “G1” portalına istinadən məlumat verir.
Məlumata görə, qara qutular Braziliyaya çərşənbə günü (Bakı vaxtı ilə cümə axşamı) çatdırılıb. Oxunma prosesinə 2 yanvarda (Bakı vaxtı ilə 3 yanvar) Braziliya Hərbi Hava Qüvvələrinin (Força Aérea Brasileira - FAB) mütəxəssisləri tərəfindən start verilib.
Qara qutulardan əldə olunan məlumatlar qəzanın səbəblərini araşdırmaq və təhlil etmək məsuliyyətini daşıyan Qazaxıstanın Aviasiya Hadisələrini Araşdırma İdarəsinə təqdim ediləcək.
Xatırladaq ki, Bakı-Qroznı reysini yerinə yetirən AZAL sərnişin təyyarəsi 25 dekabrda Aktau yaxınlığında qəzaya uğrayıb. Təyyarədə olan 67 nəfərdən 38-i həlak olub, 29 nəfər sağ qalıb.
Azərbaycan Prezidenti İlham Əliyevin sərəncamına əsasən, heyət üzvlərindən İqor İvanoviç Kşnyakin, Aleksandr Georgiyeviç Kalyaninov və Hökümə Cəlil qızı Əliyeva ölümündən sonra Azərbaycanın Milli Qəhrəmanı adına layiq görülüb. Qəzadan sağ çıxan heyət üzvləri Zülfüqar Sərdar oğlu Əsədov və Aydan Vaqif qızı Rəhimli “Rəşadət” ordeni (I dərəcə) ilə təltif edilib.
İlkin məlumatlara əsasən, qəzanın baş verməsinə xarici fiziki və texniki müdaxilə səbəb olub.
Gültac Mehdizadə
05:24 04.01.2025
Oxunuş sayı: 12410
