İran tərəfi bu cür təxribatlara son qoymalıdır
Bu yaxınlarda İranın Ərdəbil şəhərində məsciddə Çaldıran döyüşünün anım mərasimi zamanı məscidin imamı Azərbaycan və Türkiyə prezidentlərinə qarşı hörmətsiz ifadələr işlədib. Biz qonşuluğumuzda olan İran İslam Respublikası ilə daima dostluq və qonşuluq münasibətlərimizi qorumağa və inkişaf etdirməyə çalışmışıq. Lakin atılan bu addım bu dostluq və qonşuluğa edilən xəyanətdir. Təssüflər olsun ki, bu cür hallarla rastlaşmağımız ilk deyil. İranın müxtəlif vəzifəli şəxsləri daima Azərbaycana qarşı ərazi iddiası yaxud da böhtanla çıxış edirlər. Azərbaycan Xarici İşlər Nazirliyi də məsələyə sərt reaksiya bildirdi və İranın Azərbaycandakı səfiri Azərbaycan Xarici İşlər Nazirliyinə çağırıldı.
Mövzu ilə bağlı deputat Ceyhun Məmmədov Crossmedia.az saytına açıqlama verib:
"Təəssüflə qeyd etmək lazımdır ki, birinci dəfə deyil bu təkrarlanır. Biz Ərdəbil şəhərinin imamının bu cür bəyanatlarını daha əvvəl də görmüşük. Ərdəbil məscidinin imamı vəzifəsi kifayət qədər yüksək vəzifədir və Ali dini lider tərəfindən bu şəxs vəzifəyə təyin olunur. Rəsmilərin də iştirak etdiyi tədbirdə, bu cür vəzifə insanı prezident İlham Əliyevə və Türkiyə prezidenti Rəcəb Tayyib Ərdoğana qarşı xoşagəlməz ifadələr səsləndirir və Azərbaycan ərazilərində zamanla İran bayrağının dalğalanacağına dair iddialar irəli sürür. Bu kifayət qədər ciddi bir məsələdir. Əgər bu şəxs özbaşına bunu edirsə, İran rəsmiləri tərəfindən bu məsələyə münasibət bildirilməlidir və İranın bu məsələ ilə bağlı mövqeyi açıqlanmalıdır".
Deputat Azərbaycanın İrana olan qonşuluq münasibətlərinə də diqqət çəkib:
"Biz hər zaman qonşu dövlətlərlə, həmçinin İranla qonşuluq münasibətlərinin qorunmasından yana olmuşuq və həmişə də bu istiqamətdə çalışmışıq. Ona görə İran rəsmiləri ifadələrinə diqqət etməlidirlər. Ərdəbil məscidi imamının atdığı bu addım rəsmi şəxsə yaraşmayan bir addım idi. Bu, iki ölkənin liderinə qarşı bu hörmətsiz münasibət və həqarətdir. İranın Ali dini liderinə qarşı belə bir addım atılsa ki, biz heç vaxt belə bir addım atmırıq, İranın məsələyə mövqeyini təsəvvür etmək çətindir. Biz bir daha İran tərəfinə öz mövqeyimizi bildirərək bu cür təxribatlara son qoymağa çağırırıq. Azərbaycan Xarici İşlər Nazirliyi də məsələyə ciddi münasibət bildirdi və biz İran tərəfindən bu məsələyə münasibət bildirilməsini gözləyirik".
Ayhan Ağarzayev
18:18 02.01.2025
Oxunuş sayı: 15960
