Rusiya açıqladı: Ukraynada 220 yaşayış məntəqəsi nəzarətə götürülüb
Rusiya Müdafiə Nazirliyi 2026-cı ilin əvvəlindən Ukraynada 5 300 kvadratkilometrdən çox əraziyə və 220-dən artıq yaşayış məntəqəsinə nəzarətin təmin edildiyini iddia edib.
Crossmedia.az xəbər verir ki, Rusiya Müdafiə Nazirliyi bu barədə məlumat yayıb.
Nazirliyin məlumatına görə, yalnız sentyabr ayında 670 kvadratkilometrdən çox ərazi və 27 yaşayış məntəqəsi Rusiya qüvvələrinin nəzarətinə keçib.
Rusiya tərəfi həmçinin Sumı və Xarkov vilayətlərinin sərhədyanı ərazilərində təhlükəsizlik zonasının yaradılması istiqamətində əməliyyatların davam etdiyini bildirib. Nazirliyin iddiasına görə, sentyabrın 5-dən etibarən Xarkov vilayətinin şimal-şərq hissəsində Ukraynanın nəzarətində olan ərazinin 152 kvadratkilometr hissəsi Rusiya qüvvələrinin nəzarətinə keçib və doqquz yaşayış məntəqəsi ələ keçirilib.
Rusiya Müdafiə Nazirliyi Zaporojye istiqamətində də irəliləyişin davam etdiyini açıqlayıb. Bildirilib ki, sentyabrın əvvəlindən bu istiqamətdə dörd yaşayış məntəqəsi nəzarətə götürülüb və Orixov ətrafında döyüşlər davam edir.
Nazirlik ən intensiv döyüşlərin Slovyansk, Kramatorsk və Drujkovka istiqamətində, eləcə də Dobropillya ətrafında getdiyini bildirib.
Rusiya tərəfi Ukraynanın cəbhədəki vəziyyətlə bağlı məlumatlarını da tənqid edib və Kiyevin Qərb mediası və hərbi ekspertlərin dəstəyi ilə “informasiya kampaniyası” apardığını iddia edib.
Ukrayna tərəfi Rusiyanın son açıqlamalarına hələ münasibət bildirməyib. Döyüşlərin davam etdiyi şəraitdə Rusiya Müdafiə Nazirliyinin açıqladığı ərazi və yaşayış məntəqələri ilə bağlı məlumatları müstəqil şəkildə tam təsdiqləmək mümkün deyil.
14:58 19.09.2026
Oxunuş sayı: 48
