Xarici xəbərlər
Çin və Braziliya Pekində strateji tərəfdaşlığın gücləndirilməsini müzakirə edib
Çinin xarici işlər naziri Vanq Yi və Braziliya Prezidentinin xüsusi müşaviri Selso Amorim Pekində iki ölkə arasında münasibətlərin və əməkdaşlığın gücləndirilməsi məsələlərini müzakirə ediblər.
Crossmedia.az xəbər verir ki, bu barədə Çinin dövlət xəbər agentliyi “Sinxua” məlumat yayıb.
Görüş zamanı Vanq Yi Çin-Braziliya münasibətlərinin son illərdə “böyük sıçrayış” etdiyini bildirib. O, iki ölkə arasında əlaqələrin hərtərəfli strateji tərəfdaşlıqdan “ortaq gələcəyə malik birliyə” çevrildiyini qeyd edib.
Çinli nazir hər iki ölkəni mühüm beynəlxalq və regional məsələlər üzrə əməkdaşlığı dərinləşdirməyə, eləcə də strateji koordinasiyanı gücləndirməyə çağırıb.
Selso Amorim isə Braziliyanın “daha ədalətli dünya və daha dayanıqlı planet” naminə ortaq gələcəyə malik Çin-Braziliya birliyinin qurulması prosesinə “yeni məzmun qazandırmaq” məqsədilə Çinlə əməkdaşlığa hazır olduğunu bildirib.
Qeyd edək ki, Braziliya Prezidentinin xüsusi müşaviri Selso Amorim çərşənbə axşamı başlayan iki günlük səfər çərçivəsində Pekində olub.
06:21 17.09.2026
Oxunuş sayı: 52
