Rusiya-Ukrayna müharibəsi ən çox bu dövlətləri qazandırıb
ABŞ-də Rusiyaya qarşı yeni sanksiyaların tətbiqini nəzərdə tutan qanun layihəsinin Nümayəndələr Palatasında yekun səsverməyə çıxarılması üçün prosedur səsverməsi keçirilib. Qanun layihəsi Rusiyanın enerji ixracından əldə etdiyi gəlirləri məhdudlaşdırmaq və Moskva ilə iqtisadi əlaqələri davam etdirən ölkələrə təzyiq göstərmək məqsədi daşıyır.
Layihənin qəbul ediləcəyi təqdirdə, Rusiyadan neft və qaz alan ölkələrə qarşı 100 faizə qədər gömrük rüsumlarının tətbiqinə imkan yarana bilər. Bu müddəa ABŞ-nin Rusiya ilə enerji ticarətini davam etdirən dövlətlərə qarşı iqtisadi təzyiq mexanizmlərini genişləndirməsini nəzərdə tutur.
Sənədin Nümayəndələr Palatasında yekun səsverməyə çıxarılması üçün keçirilən prosedur səsverməsi qanun layihəsinin qanunvericilik prosesində növbəti mərhələyə keçidi baxımından əhəmiyyət daşıyır. Layihənin gələcək taleyi palatada keçiriləcək yekun səsvermədən və qanunvericilik prosesinin digər mərhələlərindən asılı olacaq.
Mövzu ilə bağlı politoloq Oqtay Qasımov Crossmedia.az-a açıqlamasında bildirib ki, ABŞ-nin Rusiyaya qarşı yeni sanksiyalar tətbiq etməsi iki ölkə arasındakı münasibətlərə mənfi təsir göstərə bilər:
“ABŞ-nin Rusiyaya yeni sanksiyalar tətbiq etməklə bağlı müzakirələri və belə bir qərarın qəbul edilməsi, şübhəsiz ki, ABŞ-Rusiya münasibətlərinə müəyyən qədər mənfi təsir göstərəcək. Amma ABŞ məhz təzyiq elementləri və alətləri vasitəsilə Rusiyanı Ukrayna müharibəsi ilə bağlı danışıqlar masasına gətirmək, Amerikanın vasitəçilik təşəbbüsü ilə bu prosesin aparılmasına vadar etmək niyyəti güdür. Şübhəsiz ki, yeni sanksiyaların tətbiqi Rusiya üçün mənfi nəticələrə gətirib çıxaracaq. Çünki Ukrayna müharibəsi başlayandan Rusiyaya tətbiq olunan sanksiyalar artıq müəyyən təsirini göstərib və Rusiya iqtisadiyyatında daralmalar baş verməkdədir”.
Politoloq qeyd edib ki, müharibə başlayandan Rusiya neftinin və qazının Qərbdəki alıcılarını itirib və indi Şərqə yönəlib:
“Şərqdə isə onun əsas alıcıları Çin və Hindistandır. Çin və Hindistan da Rusiyanın enerji resurslarını alarkən müəyyən qədər ölçülü-biçili davranmağa çalışırlar. Hərçənd ki, Rusiya enerji resursları onlar üçün daha ucuz başa gəlir və bu da həmin ölkələrin iqtisadiyyatına müsbət təsir göstərir. Amma eyni zamanda, bu ölkələr ABŞ ilə münasibətlərin pisləşməsini də istəmirlər. O baxımdan, onlar daha korrekt hərəkət etməklə öz maraqlarını təmin edirlər.
Şübhəsiz ki, Ukrayna-Rusiya müharibəsindən ən çox qazanan ölkələr elə məhz bu iki dövlətdir. Çünki onlar Rusiyanın ucuz enerji resurslarını almaqla iqtisadiyyatlarını inkişaf etdirirlər.
Amma burada ikinci dərəcəli sanksiyaların tətbiq olunması və 100 faizlik rüsum, əlbəttə ki, Çin-ABŞ və Hindistan-ABŞ münasibətlərinə də müəyyən qədər təsir göstərəcək. Bu baxımdan, ABŞ daha çox elə addımlar atmalıdır ki, bu, Rusiyanı danışıqlar masasına oturmağa vadar etsin, Amerikanın bu prosesdə vasitəçiliyini geri çevirməsin və müəyyən istəklər üzrə güzəştlərə getməsinə səbəb olsun. Həm də Çin və Hindistanla münasibətləri korlamadan Rusiyaya təzyiq göstərə bilsin. Bu baxımdan, əlbəttə ki, sanksiyalar məsələsində, xüsusilə də Rusiyanın əsas enerji alıcıları olan bu iki ölkə ilə münasibətlərdə Tramp administrasiyasının mümkün qədər tədbirli və ölçülü davranması gözləniləndir”.
Nuray Mehtiyeva
19:00 16.09.2026
Oxunuş sayı: 39
