Xarici xəbərlər

Almaniya süni intellektin inkişafının dayandırılmasına qarşı çıxıb

Almaniya hökuməti süni intellekt sistemlərinin təhlükəsizliyi ilə bağlı inkişaf proseslərinin dayandırılmasının Avropa üçün real və tətbiqolunan seçim olmadığını bildirib.

Crossmedia.az xəbər verir ki, Almaniya hökumətinin sözçüsü aparıcı süni intellekt şirkətlərinin inkişaf tempinin azaldılması ilə bağlı çağırışlarına münasibət bildirib.

Açıqlamada qeyd olunub ki, Avropanın rəqəmsal suverenliyinin gücləndirilməsi süni intellekt sahəsində yeni işlənmələrin və innovasiyaların davam etdirilməsindən asılıdır.

Almaniya hökumətinin qlobal süni intellekt sahəsindəki inkişafları yaxından izlədiyi və sektor liderlərinin xəbərdarlıqlarını ciddi qəbul etdiyi bildirilib. Açıqlamaya görə, test mühitlərindən kənara çıxaraq digər sistemlərə müstəqil şəkildə daxil ola bilən süni intellekt modellərinin ortaya çıxması tamamilə yeni təhlükə ssenarisi yarada bilər və bununla bağlı yeni siyasət addımlarının atılması tələb olunacaq.

Berlin süni intellekt üzərində effektiv beynəlxalq nəzarətin təmin edilməsi üçün ABŞ və Çinin də prosesə cəlb edilməsinin vacib olduğunu vurğulayıb. Almaniya bu məsələni G7 səviyyəsində də gündəmə gətirməyi planlaşdırır.

Süni intellektin inkişaf tempinin azaldılması ilə bağlı çağırışlar isə texnologiya və siyasət dünyasında fikir ayrılıqlarına səbəb olub. “Anthropic” şirkətinin rəhbəri Dario Amodei inkişaf tempinin aşağı salınmasına və prosesə müstəqil nəzarətçilərin cəlb edilməsinə çağırış edib. Bu mövqeyə “OpenAI” rəhbəri Sem Altman və “Tesla” rəhbəri İlon Mask da dəstək verib.

Bununla yanaşı, bir sıra siyasi və biznes nümayəndələri inkişafın ləngidilməsinə qarşı çıxaraq belə addımların süni intellekt bazarında inhisarlaşmaya səbəb ola biləcəyini düşünür. Onlar Qərb ölkələrində mümkün fasilənin Çin üçün qlobal texnoloji rəqabətdə ciddi üstünlük yaradacağından narahatdırlar.

Mövzular:

Almaniya hökuməti süni intellekt Avropanın rəqəmsal suverenliyi ABŞ Çin

🖨 Çap et

20:42 14.09.2026

Oxunuş sayı: 53