Rusiya PUA-sı sərhədə yaxın qatarı vurdu
Kiyevdən Varşavaya hərəkət edən sərnişin qatarı Polşa sərhədindən iki kilometr aralıda Rusiya PUA-sının hücumuna məruz qalıb.
Crossmedia.az xəbər verir ki, “The Guardian” bu barədə məlumat yayıb.
Ukrayna xarici işlər naziri Andrey Sibiha hadisəni “Putinin terrorunun birbaşa Avropa İttifaqı və NATO-nun qapılarını döyməsi” kimi qiymətləndirib.
Ukraynaya gecə saatlarında həyata keçirilən hücumlar zamanı 450-dən çox Rusiya PUA-sı və raketindən istifadə olunub. Hücumlar nəticəsində azı 6 nəfər ölüb, 40-dan çox insan yaralanıb. Ukrayna Hərbi Hava Qüvvələri 405 PUA və 4 raketin zərərsizləşdirildiyini açıqlayıb.
Adətən Kiyev və şərq cəbhəsi ilə müqayisədə daha sakit olan Ukraynanın qərb bölgələri də hücumlardan ciddi zərər görüb. Zərbələr Polşada hava hücumu xəbərdarlıqlarının elan edilməsinə səbəb olub.
Ukrayna və Polşa rəsmilərinin məlumatına görə, iki ölkə arasındakı Dorohusk-Yahodın sərhəd-keçid məntəqəsindən bir kilometrdən də az məsafədə yerləşən yük maşınına da zərbə endirilib.
“Reuters”in məlumatına görə, Rusiya Müdafiə Nazirliyi zərbələrin Avropadan Ukraynaya hərbi yüklərin daşınmasına xidmət edən infrastruktura yönəldiyini bildirib.
Varşavaya gedən qatarda “Daily Humanity” təşkilatının direktoru Katerina Serqatskova da olub. Onun sözlərinə görə, sərnişinlər gecə saatlarında iki saat qatardan düşürüldükdən sonra, səhər saat 09:00 radələrində Polşa sərhədinə yaxınlaşarkən yenidən təxliyə edilməyə çağırılıblar.
Serqatskova bildirib ki, sərnişinlərdən bu dəfə daha sürətlə hərəkət etmələri tələb olunub və o, ilk PUA-nın səsini eşidib. Onun sözlərinə görə, sərhəddən bir neçə yüz metr məsafədə “Shahed” PUA-larını görmək və eşitmək olduqca xoşagəlməz təcrübə olub.
Qatarda ölən və ya yaralananların olmadığı bildirilib.
Ukraynanın Donetsk vilayətində 3 nəfər, cənubdakı Nikolayev vilayətində isə 71 yaşlı qadın həlak olub.
Ukrayna xarici işlər naziri Andrey Sibiha Rusiyanın hücumlarının yalnız Ukraynanın sərhədlərinə qarşı həyata keçirilən zərbələrin davamı olmadığını bildirib.
Ukrayna Prezidenti Volodimir Zelenski isə Telegram kanalında qeyd edib ki, ukraynalılar hücumların Avropaya daha da yayılmasının qarşısını almaq üçün hər gün mübarizə aparır, bunun üçün həyatlarını riskə atır və təcavüzün genişlənməsinin qarşısını alırlar.
19:59 13.09.2026
Oxunuş sayı: 50
