Xarici xəbərlər

Ukraynanın baş prokuroru vəzifəsindən istefa verib

Ukraynanın baş prokuroru Ruslan Kravçenko bəzi vəzifəli şəxslərin külli miqdarda pul yuyulmasında iştirak etməsi ilə bağlı araşdırmadan sonra istefa verib.

Crossmedia.az xəbər verir ki, “The Guardian” bu barədə məlumat yayıb.

Kravçenkonun istefası Ukraynada korrupsiyaya qarşı mübarizə çərçivəsində aparılan araşdırmalar fonunda baş verib. O, özünün hər hansı qanunsuzluqda iştirakını rədd edib.

Ukraynanın Milli Antikorrupsiya Bürosu (NABU) və İxtisaslaşdırılmış Antikorrupsiya Prokurorluğu (SAPO) baş prokurorluğun əməkdaşlarından birinin qanunsuz fəaliyyət göstərən çağrı mərkəzlərini himayə edən şəbəkəyə yardım etdiyini açıqlayıb.

İstintaqa görə, həmin çağrı mərkəzləri Ukrayna, Rusiya və Avropa İttifaqı ölkələrinin vətəndaşlarını telefon vasitəsilə aldadaraq onların pullarını ələ keçirib. Şəbəkənin əldə etdiyi vəsaitlərin milyonlarla dollar həcmində olduğu və qanunsuz yollarla yuyulduğu bildirilir.

NABU araşdırma çərçivəsində baş prokurorluğun binasında axtarış aparıb. Agentlik şəbəkə ilə əlaqəli beş vəzifəli şəxsi müəyyən etdiyini açıqlayıb və böyük məbləğdə nağd pulun aşkarlandığını bildirib.

Kravçenko istefasının siyasi qərar olduğunu bildirib. O, qərarı tutduğu vəzifənin siyasi qarşıdurma vasitəsinə çevrilməsinin qarşısını almaq məqsədilə qəbul etdiyini deyib.

Ukrayna Prezidenti Volodimir Zelenski Kravçenkonun istefa ərizəsini parlamentə təqdim edəcəyini açıqlayıb. İstefanın qüvvəyə minməsi üçün Ali Radanın təsdiqi tələb olunur.

Mövzular:

Ukrayna Ukraynanın baş prokuroru Ruslan Kravçenko Milli Antikorrupsiya Bürosu İxtisaslaşdırılmış Antikorrupsiya Prokurorluğu Rusiya Avropa İttifaqı

🖨 Çap et

18:03 11.09.2026

Oxunuş sayı: 48