Azərbaycan Çinlə investisiya əməkdaşlığını gücləndirir
Azərbaycan Dövlət Neft Fondunun (ARDNF) İcraçı direktoru İsrafil Məmmədovun rəhbərlik etdiyi nümayəndə heyəti Çinlə investisiya əməkdaşlığının gücləndirilməsi və qarşılıqlı faydalı tərəfdaşlıq imkanlarının genişləndirilməsi məqsədi ilə 6–11 sentyabrda bu ölkəyə işgüzar səfər edib.
Crossmedia.az fonda istinadən xəbər verir ki, səfər çərçivəsində nümayəndə heyəti bir sıra beynəlxalq maliyyə qurumları, investisiya şirkətləri və dövlət qurumlarının nümayəndələri ilə görüşlər keçirib, iri regional tədbirlərdə iştirak edib.
Səfərin əsas hissəsi Syamen şəhərində keçirilən Çinin Beynəlxalq İnvestisiya və Ticarət Sərgisi ("CIFIT") çərçivəsində baş tutub. ARDNF nümayəndələri sərginin açılış mərasimində iştirak ediblər. Bundan əlavə, "CIC"-nin sədri və icraçı direktoru Qingsong Zhang, həmçinin "Brookfield Asset Management" şirkətinin baş icraçı direktoru Brüs Flətt ilə görüşlər keçirilib. Daha sonra ARDNF-in İcraçı direktoru Çinin vitse-prezidenti Han Zhengin sədrlik etdiyi dəyirmi masada iştirak edib. Tədbirdə Çinin mərkəzi və regional dövlət qurumlarının rəhbər vəzifəli şəxsləri, eləcə də dünyanın aparıcı korporasiyalarının rəhbərləri, enerji, maliyyə, sənaye, texnologiya, səhiyyə və istehlak sektorlarını təmsil edən qlobal şirkətlərin nümayəndələri iştirak edib.
Bundan əlavə, İ.Məmmədov "Çinin Xaricə İnvestisiyası" adlanan sessiyada Çin-ASEAN Birgə İnvestisiya Şurasına ("CAJIC") həsr olunan panel müzakirədə çıxış edib. Regionun aparıcı suveren investorlarının iştirak etdiyi müzakirədə birgə fəaliyyət nəticəsində regiona daha çox investisiya cəlb edilməsi və Çin ilə "ASEAN" arasında kapital mübadiləsinin gücləndirilməsi imkanları müzakirə olunub. Çıxışında İcraçı direktor Çin və "ASEAN" bazarlarının artıq ayrı-ayrı deyil, vahid iqtisadi ekosistem kimi qiymətləndirilməli olduğunu vurğulayıb. Onun sözlərinə görə, ARDNF üçün region ilə əməkdaşlıq təkcə kapital yönləndirmək deyil, həm də etibarlı tərəfdaşlıqlar qurmaq və bazar barədə dərin təcrübə əldə etmək deməkdir. O, həm də Fondun bu formatda iştirakının Azərbaycanın Asiya bazarları ilə maliyyə əlaqələrinin gücləndirilməsi baxımından strateji əhəmiyyət daşıdığını bildirib.
Səfər zamanı ARDNF nümayəndə heyəti, həmçinin dünyanın aparıcı maliyyə şirkətlərindən biri olan "Brookfield Asset Management" ilə əlaqələrini genişləndirib. Heyət Honq-Konqda "Brookfield Asset Management"in təşkil etdiyi forumda iştirak edib. Forumda qlobal kapital bazarlarının cari vəziyyəti, o cümlədən kredit, infrastruktur, enerji, daşınmaz əmlak və özəl kapital sahələri üzrə investisiya perspektivləri müzakirə olunub, aparıcı beynəlxalq institusional investorların bu istiqamətlərdə formalaşan tendensiyalara dair yanaşmaları təqdim edilib.
Səfər çərçivəsində əldə olunan nəticələr ARDNF-in Asiya regionunda formalaşan investisiya əlaqələrinin davamlı genişləndirildiyini göstərir. "CIC" ilə aparılan görüşlər Fondun bu bazarda formalaşmış institusional əlaqələrini daha da dərinləşdirməsinə, "CAJIC"-in təsisçi üzvlərin biri olması isə ARDNF-nin regionun aparıcı suveren fondları şəbəkəsində mühüm mövqe qazanmasına töhfə verir. Eyni zamanda, "Brookfield Asset Management" kimi qlobal institusional investorlarla əməkdaşlığın genişləndirilməsi ARDNF-yə regional bazarlar barədə birbaşa bilik, etibarlı tərəfdaşlar və yeni investisiya imkanlarına çıxış təmin edir.
Səfər Azərbaycan üçün daha geniş strateji məna daşıyır. Orta Dəhlizin Asiya və Avropa arasında əlaqələrin gücləndirilməsində rolunun artması Azərbaycanın iki region arasında strateji mövqeyini daha da önəmli edir. ARDNF-nin Asiyanın aparıcı investisiya institutları ilə əməkdaşlığının genişlənməsi isə bu fiziki əlaqəni maliyyə əlaqəsi ilə tamamlayır, Azərbaycan Asiya ilə həm coğrafi, həm də iqtisadi baxımdan daha sıx bağlanır.
16:33 11.09.2026
Oxunuş sayı: 228
