Həkimlərin maaş artımı necə hesablanacaq? - Açıqlandı
Azərbaycanda TƏBİB-in tabeliyində çalışan 72 212 tibb işçisinin əməkhaqqının artırılması ilə bağlı yeni qaydalar sentyabrın 1-dən qüvvəyə minib. Yeni sistemdə həkimlərin göstərdiyi tibbi xidmətlərin sayı ilə yanaşı, pasiyent məmnuniyyəti də həvəsləndirici əlavənin hesablanmasında nəzərə alınır. Bu isə maaş artımının yalnız tibb işçilərinin sosial təminatına deyil, göstərilən tibbi xidmətin keyfiyyətinə də təsir edib-etməyəcəyi məsələsini gündəmə gətirir.
İqtisadçı Akif Nəsirli Crossmedia.az-a açıqlamasında yeni sistemdə həkimlərin əməkhaqqının yalnız sabit maaşdan ibarət olmayacağını bildirib: “Yeni sistemdə həkimin əməkhaqqının yalnız sabit maaşdan ibarət olması nəzərdə tutulmur. Əsas əməkhaqqına göstərilən tibbi xidmətlərin həcmi və nəticələri ilə bağlı dəyişən hissə əlavə olunur. Yəni həkim nə qədər çox və keyfiyyətli tibbi xidmət göstərirsə, onun əlavə ödəniş alma imkanları da artır. Burada pasiyent məmnuniyyəti də qiymətləndirmə meyarlarından biri kimi nəzərə alınır”.
İqtisadçının sözlərinə görə, həkimlərin faktiki əməkhaqqı göstərdikləri xidmətlərin sayı və mürəkkəbliyi ilə yanaşı, müəyyən edilmiş keyfiyyət göstəricilərindən də asılı olacaq: “Beləliklə, faktiki əməkhaqqı sabit tarif hissəsi ilə yanaşı, həkimin göstərdiyi xidmətlərin sayı, xidmətlərin mürəkkəbliyi və müəyyən edilmiş keyfiyyət göstəriciləri əsasında formalaşan həvəsləndirici əlavələrdən təşkil olunacaq. Pasiyent məmnuniyyəti üzrə göstəricilər də bu əlavənin məbləğinə təsir edə bilər”.
Akif Nəsirli qeyd edib ki, bu yanaşmada əsas məqsəd həkimin gəlirini yalnız tutduğu vəzifə ilə deyil, onun real fəaliyyətinin nəticələri ilə əlaqələndirməkdir: “Bu yanaşmanın məqsədi həkimin gəlirini təkcə işlədiyi vəzifə ilə deyil, onun real fəaliyyətinin nəticələri ilə də əlaqələndirməkdir”.
Nigar Xəlilli
14:00 11.09.2026
Oxunuş sayı: 60
