Yulian Röpke: AZAL pilotları Aktau üzərində möcüzə yaratdılar
“AZAL” aviaşirkətinin təyyarəsinin qəzaya uğraması nəticəsində 38 nəfər həlak olub, lakin 29 sərnişin pilotların qeyri-adi fədakarlığı sayəsində sağ qalıb.
Crossmedia.az xəbər verir ki, bu barədə “BILD” qəzetinə ekspert Yulian Röpke bildirib.
Təyyarə Qroznı üzərində Rusiyanın Hava Hücumundan Müdafiə qüvvələri tərəfindən atəşə tutulsa da, yüzlərlə kilometr məsafə qət edərək Aktau şəhərinə çata bilib. Aviasiya eksperti Yakob Vert pilotların hərəkətlərinə yüksək qiymət verərək qeyd edib:
“Uçuşun gedişi və eniş cəhdinə əsasən təyyarənin idarəolunmaz vəziyyətdə olduğunu demək olar. Onun tamamilə dağıdılmasının qarşısını pilotların möhtəşəm bacarığı aldı. Təyyarəni Xəzər dənizinin üzərindən keçirməklə məhz Aktauya gətirə bildilər.”
Əgər təyyarə suya eniş etsəydi, bütün sərnişinlərin həyatı üçün bu, ölüm hökmü olardı. Quruya eniş zamanı Embraer E190 təyyarəsi ön hissəsi ilə yerə çırpılıb, bu da əsas zərbəni üzərinə götürüb. Nəticədə sərnişinlərin olduğu arxa hissə xilas edilib.
Yulian Röpke ehtimal edir ki, təyyarənin Aktauya uçmasının səbəbi Rusiya hakimiyyətinin təyyarənin vurulmasından sonra ona təcili eniş üçün icazə verməməsi ola bilər.
Gültac Mehdizadə
08:38 30.12.2024
Oxunuş sayı: 16567
